Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 125 Hüküm no: 117 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehir borcuna karşılık ev eşyasının takas edildiği Mahmiye-i Galata hâricinde el-Hâc Memi mahallesinde sâkin Hasan Bey b. Abdullah nâm sipâhi meclis-i şer‘-i şerîf-i enverde hâmiletü kitâb hâlen zevcesi olan Servinaz bt. Abdullah nâm hâtun mahzarında takrîr-i da‘vâ edip zevcem mezbûre Servinaz’ın mehr-i müeccelinden zimmetimde on altı bin akçe hakkı olup mahalle-i mezbûrede vakf edip hâlâ sâkin olduğum lede’l-ahâlî ve’l-cîrân ma‘lûmü’l-hudûd olan menzilde ...? kıymet ve emsâlde beş yüz akçeye üç ade[d]i ile mülk döşeğimi ve üç yüz elli akçeye dört aded beledî yastığı ve iki yüz akçeye üç aded minderi üç yüz elli iki yemeni yorganı ve iki yüz akçeye üç aded köhne alaca kilim ve iki yüz akçeye bir keçe ve elli akçeye bir köhne hamam kaliçesi ve yüz akçeye el değirmeni ve iki yüz elli akçeye üç aded köhne küçük kaliçeyi ve iki akçeye beş kıt‘a gararı ve elli akçeye köhne kilim ve yüz elli akçeye bir Yanbolu kebesi ve siyah Yanbolu kebesini yüz elli akçeye üç yüz akçeye iki aded karkarî? velenseyi ve yüz elli akçeye üç çarşafı ve elli akçeye bir perdeyi ve altmış akçeye iki aded Mısır hasırını ve elli akçeye bir Hindî peşkiri ve iki yüz akçeye iki güğüm ve yüz elli akçeye iki tencereyi ve otuz akçeye bir havanımı ve yüz elli akçeye üç bakraç ve elli akçeye üç şamdan ve altmış akçeye bir maşrabayı ve kırk akçeye iki kevgiri ve yüz akçeye bir küçük kazgan ve elli akçeye iki küçük sahan ve iki tası yirmi akçeye ve elli akçeye iki yahni tepsisi ve yüz akçeye iki sahan ve yüz elli akçeye bir büyük tencereyi ve otuz akçeye bir tâbeyi ve elli akçeye bir leğeni ve yüz akçeye üç köhne tülbenti ve dört yüz akçeye bir yeşil ferâceyi ve seksen akçeye kırmızı zıbınımı ve yüz elli akçeye bir makrama kuşağı ve üç yüz akçeye ve yetmiş akçeye iki köhne zıbın ve yüz akçeye bir köhne kürkümü ve yüz akçeye bir kazma ve bir satır ve bir çekiç ve bir balta ve bir küreğimi zevcem mezbûreye bey‘ ve teslîm edip eşyâ-i mezbûrenin kıymeti ki cem‘an elli bin akçe olur semen-i mezbûr elli bin akçeyi zimmetime lâzım sâlifü’z-zikr on altı bin mehr-i müeccelden altı bin akçe ile takās eyledik eşyâ-i ma‘dûd-ı mezbûre zevcem mezkûrenin mülk-i müşterâsıdır deyû tasarrufât-ı şer‘iyyesi nâfize olduğu hâlde ikrâr-ı tav‘î ve i‘tirâf-ı mer‘î ettikde gıbbe’t-tasdîk mâ vaka‘a bi’t-taleb ketb olundu. Tahrîren fi’l-yevmi’s-sâbi‘ min Şevvâli’l-mükerrem sene hamse ve elf. Şuhûd: Abbas Efendi b. İbrahim, Mustafa b. Mehmed, Mustafa b. Abdurrahman, Ahmed Çelebi b. Mustafa el-Müezzin, Murad b. Hızır, İsa b. Ömer, Mehmed b. Abdullah, Yusuf b. Abdullah