Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 126 Hüküm no: 118 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehir alacağının sâbit olduğu Mahmiye-i Galata hâricinde el-Hâc Memi mahallesinde sâkine Servinaz bt. Abdullah nâm hâtun meclis-i şer‘-i şerîfde zevci Hasan Bey b. Abdullah mahzarında takrîr-i kelâm ve ta‘bîr merâm edip zevcim mezbûr Hasan Bey zimmetinde fıddî râyic fi’l-vakt on altı bin akçe üzerine akd olunmuş mehr-i müeccelim vardır suâl olunup tahrîr olunmasın taleb ederim dedikde gıbbe’s-suâl mezbûr Hasan Bey cevâb verip mezkûre Servinaz’ın mehr-i müecceli on dört bin akçe üzerine akd olmuşdur zimmetimde mezbûrenin on dört bin mehr-i müecceli vardır dedikde mezbûre Servinaz’ın sıdk-ı makāline beyyine taleb olundukda udûl-i müslimînden Mehmed b. Ahmed ve el-Hâc Mustafa b. Ahmed nâm kimesneler meclis-i şer‘a li ecli’ş-şehâde hâzırân olup istişhâd olundukda fi’l-vâki‘ mezbûre Servinaz’ın mehr-i müecceli bizim huzûrumuzda on altı bin akçe üzerine akd olundu mezkûre Servinaz’ın zevci mezkûr Hasan Bey üzerinde on altı bin mehr-i müeccel-i ma‘kūdu vardır bu husûsa biz şâhidleriz şehâdet dahi ederiz dediklerinde gıbbe’t-ta‘dîl-i şer‘î şehâdetleri hayyiz-i kabûlde vâki‘ olmağın mâ vaka‘a bi’t-taleb ketb olundu. Tahrîren fî evâili şehri Şevvâli’l-mükerrem sene hamse ve elf. Şuhûd: Es-Sâbikūn