Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 126 Hüküm no: 119 Orijinal metin no: [16a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Evin Âişe Hatun’a ait olduğu Bundan akdem mahmiye-i Galata hâricinde kasaba-i Kasımpaşa mahallâtından el-Hâc Hasan mahallesinde sâkin iken vefât eden merhûm-ı mağfûrun leh Ali Reis b. Mustafa nâm kimesnenin karındaşı oğlu ve vârisi olan Emrullah b. İsa nâm kimesne meclis-i şer‘-i şerîfe müteveffâ-yı mezbûrun zevcesi ve vârisesi olan Âişe bt. İbrahim nâm hâtunu ihzâr ve mahzarında takrîr-i kelâm ve ta‘bîr merâm edip müteveffâ-yı mezbûrun mahalle-i mezbûrede vâki‘ hudûdunun bir tarafı Nesli Hâtun bt. Memi mülküyle ve bir tarafı tarîk-i hâs ile ve bir tarafı tarîk-i âm ile ve bir tarafı Dilsiz Ağa mülküyle mahdûd ve mümtâz olan iki bâb fevkānî beyti ve su kuyusu ve bir tahta-pûşu ve bir kileri ve bir bâb odayı ve bir matbah ve hâricinde iki bâb tahtânî beyti ve bir fırını ve bir kenîfi ve bir kapıyı ve muhavvatayı eşcâr-ı müsmire ve gayr-ı müsmiresiyle müştemil olan menzili hâlen merkūme Âişe Hâtun tasarruf edip bana âid olan hisse-i şer‘iyyemi vermekden ta‘allül eder taleb ederim suâl olunsun dedikde gıbbe’s-suâl mezbûre Âişe Hâtun inkâr ile cevâb verip menzil-i merkūmda müteveffâ-yı mezbûr Ali Reis’in vechen mine’l-vücûh ve sebeben mine’l-esbâb alâka ve medhali olmayıp benim mülk-i mahzım ve hakk-ı sarîhimdir deyû cevâb vericek müdde‘iye-i mezbûreden husûs-ı sıdk-ı makāline beyyine taleb olundukda udûl-i müslimînden ve sikāt-ı muvahhidînden fahrü’s-sulehâ eş-Şeyh İsmail b. es-Seyyid Mehmed ve fahrü’l-cüyûş Abdi Çavuş b. Mustafa ve Rıdvan Bey b. Abdullah nâm kimesneler li ecli’ş-şehâde meclis-i şer‘a hâzırûn olup fi’l-vâki‘ müteveffâ-yı mezbûr Ali Reis menzil-i merkūmda vechen mine’l-vücûh ve sebeben mine’l-esbâb alâka ve medhali yoktur menzil-i merkūm mezbûre Âişe Hâtun’un mülk-i mahzı ve hakk-ı sırfıdır deyû ikrâr etti biz bu husûsa şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl mezbûrûnun şehâdetleri hayyiz-i kabûlde vâki‘ oldukdan sonra mâ hüve’l-vâki‘ alâ vukū‘ihî kayd olundu. Hurrire fi’l-yevmi’s-sâdis ve’l-ışrîn min şehri Şevvâl sene 1005. Şuhûd: Es-Sâbikūn