Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 127 Hüküm no: 120 Orijinal metin no: [16b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Abdi Çavuş’un ödünçten alacağı olduğu Ahmed Çelebi b. Hızır ve Ali Çelebi b. el-Hâc Ahmed ve el-Hâc Ahmed b. el-Hâc Ali nâm kimesneler meclis-i şer‘-i şerîfe hâzırûn olup mahmiye-i Galata müzâfâtından Kasımpaşa kasabası mahallâtından Câmi‘[-i Kebîr] mahallesinde vefât eden âti’z-zikr müteveffânın Hasan ve İsmihan nâm sagīreynine kıbel-i şer‘den mansûb vasî olan Hüseyin Çelebi b. Mehmed nâm hasm-ı câhid mahzarında, hâmil-i kitâb fahrü’l-akrân Seyyid Abdi Çavuş b. Seyyid Ahmed’den sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i akl ve sıhhatinde bizim yanımızda ve katımızda mezbûr Seyyid Abdi Çavuş’a lâzımü’l-edâ ve vâcibü’l-kazâ râyicü’l-vakt seksen beş bin yüz akçe deyni olduğunu, bunun yetmiş dört bin akçesinin karz-ı şer‘î cihetinden, on bir bin yüz akçesinin de 1002 senesi Zilka‘de-i şerîfesinin beşinci gününden bir sene tamâmına müeccel olan müşterâ-yı makbûz samur kürk bahâsından olduğunu ikrâr ve i‘tirâf etti. Mahalle-i mezbûrede vâki‘, bir tarafdan İlyas fırını, diğer tarafdan Âişe Hâtun bt. Abdullah mülkü ve Mehmed Çelebi b. Behram mülkü ile, diğer iki tarafdan da tarîk-i âm ile mahdûd bulunan menzil müdde‘î-i merkūm yedinde rehn-i makbûzdur. Müdde‘î-i mezbûra meblağ-ı mezkûru kısmen veya tamâmen ahz ü kabz etmediğine dâir yemîn billâh verildikden ve şâhidlerin şehâdetlerinin ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmasından sonra mûcebince meblağ-ı mezbûrun müteveffâ-yı mersûmun muhallefâtından edâsına hükm edildi. Cerâ zâlike ve hurrire fi’l-yevmi’s-sâbi‘ aşer min şehri Şevvâli’l-mükerrem sene hamse ve elf. Şuhûdü’l-hâl: Mustafa b. Şaban, Osman Çelebi b. Sefer, Mustafa b. Abdi, Feridun Bey b. Abdullah, Ömer Çelebi b. Sefer , Ahmed Çelebi b. Ali, Hoca Halil b. Turgud, Cafer Bey b. Veli el-Bevvâbü’s-sultânî