Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 133 Hüküm no: 133 Orijinal metin no: [17b-5, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Davud Çelebi’nin vasiyeti Derviş b. Bayram el-İmâm ve el-Hâc Ferruh b. Abdullah el-Müezzin nâm kimesneler meclis-i şer‘-i şerîfe hâzırân olup, medîne-i Ebî Eyyûb-i Ensârî -aleyhi rahmetü’l-Bârî- mahallâtından Baba Haydar mahallesinde bundan akdem fevt olan Davud Çelebi b. ( )’nın ana baba bir kız karındaşı ve vârisi olan Kamer Hâtun bt. ( ) nâm hâtun kıbelinden vekîl-i şer‘î olan Mehmed Çelebi b. Seydi Ali nâm hasm-ı câhid mahzarında ve müteveffâ-yı mezbûrun vasiyyetlerini tenfîze vasiyy-i muhtâr olan Mehmed Çelebi b. Yusuf mahzarında, hâmiletü hâze’l-kitâb Yasemin bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i akl ve sıhhatinde sülüs-i cemî‘ mâlını vasiyyet etti ve meblağ-ı mezbûrdan râyicü’l-vakt üç bin akçeyi müdde‘iye-i mezbûreye ta‘yîn etti. Sikāt ve udûlden olmaları cihetiyle şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike hurrire fi’l-yevm ve’l-ışrîn fi’t-târihi’l-mezbûr sene 1005. Şuhûd: Mustafa b. Muzaffer el-İmâm, Abdülhalim b. Mehmed, Derviş b. Mehmed, Nebi b. Sarrâc, Ahmed b. Hüseyin, Hüsrev b. Abdullah, Mehmed b. Ali ve gayruhüm