Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 148 Hüküm no: 153 Orijinal metin no: [21a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Eşya davasında sulh olunduğu Bundan akdem mahmiye-i Galata hâricinde Müeyyedzâde mahallesinde sâkine iken vefât eden merhûme Emine Hâtun bt. Mustafa nâm hâtunun zevci ve vârisi olan Hasan Reis b. Abdullah meclis-i şer‘de hâmiletü’l-kitâb müteveffât-ı merkūmenin vâlidesi ve vârisesi olup sagīr oğlu Abdurrahman ve Mustafa’nın vasiyye-i şer‘iyyesi olan Hatice Hâtun bt. Memi mahzarında ikrâr ve takrîr-i kelâm edip müteveffât-ı merkūmenin muhallefâtından bir altın bileziği merkūme Hatice ahz ü kabz edip fuzûlî tasarruf ettikde ben dahi da‘vâ ve taleb eylediğimde beynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî husûs-ı mezbûra muslihûn tavassut edip es-sulhu hayrun fehvâsıyla âmil olup zikr olunan bilezik da‘vâsından fâriğ oldum ba‘de’l-yevm husûs-ı mezbûra müte‘allik da‘vâ ve nizâ‘ım sudûr eder ise inde’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun kelimât-ı meşrûhasın mukarrun lehe’l-merkūme Hatice Hâtun bi’l-muvâcehe tasdîk ve tahkīk ettikden sonra mâ vaka‘a bi’t-taleb kayd olundu. Tahrîren fi’l-yevmi’s-sâlis aşer min şehri Zilka‘deti’ş-şerîfe sene hamse ve elf. Şuhûd: Mevlânâ Hasan Efendi b. Ramazan, Ahmed Çelebi b. Mehmed Çelebi el-Müezzin, Mehmed Çelebi b. İslâm, Mehmed Çelebi b. İlyas, Mehmed Çelebi b. Hasan, Hüsrev b. Abdullah, Hüseyin b. Mehmed el-Müezzin