Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 148 Hüküm no: 154 Orijinal metin no: [21a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kumaş boyası bedelinden doğan uyuşmazlıkta sulh olunduğu Mahmiye-i Galata hâricinde kasaba-i Beşiktaş mahallâtından Sinan Paşa mahallesinde sâkin olan fahrü’l-akrân Ali Ağa b. Abdüsselâm meclis-i şer‘de hâmilü’l-kitâb bundan akdem mahalle-i mezbûrede sâkin iken vefât eden merhûm Keyvan Ağa b. Abdullah’ın evlâd-ı sıgārı olan Hasan ve Hüseyin ve Kamer ve Âişe ve Fâtıma nâm sagīrlerin vasiyy-i muhtârı olan fahrü’l-emâcid ve’l-ekârim Behram Kethüdâ b. Abdülkerim muvâcehesinde ikrâr ve takrîr-i kelâm edip müteveffâ-yı mezbûr Keyvan Ağa’da bakkam bahâsından zimmetinde sekiz bin elli akçe hakkım olup mûmâ-ileyh vasiyy-i muhtârdan da‘vâ ve taleb ettiğimde beynimizde münâza‘ât ve muhâsamât-ı şedîde vâki‘ olmuş idi el-hâletü hâzihî husûs-ı mezbûra muslihûn tavassut edip es-sulhu seyyidü’l-ahkâm fehvâsıyla âmil olup dört bin nakid akçeye sulh olup bedel-i sulh olan meblağ-ı mezbûru bi’t-tamâm ve’l-kemâl ahz ü kabz edip zimmetini ibrâ eyledim dedikde mukırr-ı mezbûrun ikrâr-ı meşrûhunu mukarrun lehü’l-merkūm vicâhen ve şifâhen tasdîk ve tahkīk ettikden sonra mâ vaka‘a kayd olundu. Tahrîren fî 11 şehri Zilka‘deti’ş-şerîfe sene hamse ve elf. Şuhûd: Murad Bey b. Abdullah, el-Hâc Süleyman b. Abdullah, Ali Kethüdâ b. Abdullah, Ali Bey b. Abdullah, Ahmed Bey b. Hasan ve gayruhüm