Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 149 Hüküm no: 156 Orijinal metin no: [21b-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Paşa’nın yıkılmaya yüz tutan evinin Behram Kethüdâ’ya satıldığı Elhamdü lillâhi’llezi ehalle’llâhü’l-bey‘a ve harreme’r-ribâ ve’s-salâtü ve’s-selâmü alâ nebiyyihî Muhammedin eşrefi’l-verâi ve alâ âlih ammâ ba‘d işbu kayd, bey‘ ikrârını hâvî sahîh ve şer‘î bir hüccetdir. Merhûm ve mağfûrun leh Hazret-i Hasan Paşa’nın Feridun Bey, Fâtıma ve Belkıs nâm evlâd-ı sıgārına vasiyy-i muhtâr olan emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm el-muhtas bi mezîdi inâyeti’l-meliki’l-allâm Hazret-i Memi Paşa ve fahrü’l-muhadderât ve’l-muvakkarât Züleyha Hâtun nâm merhûm-ı mezbûrun kızı kıbelinden âti’z-zikr bey‘i ikrâra ve kabz-ı semene vekâleti Reyhan Ağa b. Abdullah ve Mahmud Ağa b. Abdullah nâm şâhidlerin şehâdetleri ile sâbit olan fahrü’l-akrân Seyyid Ebû Abdullah b. Seyyid (…) meclis-i şer‘-i şerîf-i şâmih-i imâd ve mahfil-i dîn-i münîf-i râsih-i evtâda hâzırân olup, müteveffâ-yı mezbûrdan irs-i şer‘le intikāl eden, mahmiye-i Galata müzâfâtından Beşiktaş kasabası mahallâtından Sinan Paşa mahallesinde vâki‘, dâhilî ve hâricî avlulu, dâhilî avlusu tahtânî iki beyti, selâmlığı, eşcâr-ı müsmire ve gayr-ı müsmireyi, hâricî avlusu fevkānî iki beyti, tahtânî bir beyti, dükkânı, matbahı, su kuyusunu ve helâyı hâvî olan cemî‘ menzili cümle tevâbi‘ ve levâhıkı ve kâffe-i hukūk ve merâfıkı ile râyicü’l-vakt bin akçe semen-i mu‘ayyen-i makbûzla, îcâb ve kabûlü hâvî bey‘-i bâtt-ı sahîh ile hâfız-ı hâze’l-kitâb fahrü’l-emâcid ve’l-ekârim Behram Kethüdâ b. Abdülkerim’e vesâyeten ve vekâleten bey‘ ettiklerini ikrâr ettiler. O da kendi malıyla ve kendi nefsi için menzil-i merkūmu onlardan iştirâ etti. Vâki‘ ikrâr, müşterî-i mezbûr tarafından vicâhen ve şifâhen tasdîk edildi. İşbu mübâya‘a-i mezkûre, menzil-i merkūmun harâba müşrif olması sebebiyle verese arasında taksîm edilmesi zarûretiyle menzil-i mezkûrun mecâlis-i tâlibîn ve mehâfil-i râgıbîne mirâren ve kirâren arz olunması ve semen-i merkūmun müşterî-i mesfûr üzerinde karâr eylemesinden sonra vâki‘ oldu. Vaka‘a’l-istişhâd ve’t-tahrîr fi’l-yevmi’l-hâdî aşer min şehri Zilka‘deti’ş-şerîfe sene hamse ve elf. Şuhûd: Kurd Çelebi b. Abdülcebbar, Memi Kapudân b. Abdullah, Hasan b. Abdullah tâbi‘-i Sancakdâr, Ali Kethüdâ b. Abdullah tâbi‘-i merhûm Ali Paşa, Memi Reis b. Küçük, Hasan Reis b. [Abd]ülcebbar, İbrahim b. Abdullah ve gayruhüm