Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 150 Hüküm no: 157 Orijinal metin no: [21b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Reis’in evinin Behram Kethüdâ’ya satıldığı Mahmiye-i Galata hâricinde kasaba-i Kasımpaşa mahallâtından el-Hâc Hüsrev mahallesinde sâkin iken vefât eden merhûm ve mağfûrun leh hâssa reislerinden Ali Reis b. Abdullah nâm kimesnenin zevcesi ve vârisesi olan Âişe bt. İbrahim nâm hâtun tarafından husûs-ı âti’z-zikri ikrâr[a] şer‘an vekâleti sâbite olan fahrü’l-akrân İbrahim Bey b. Abdülmennân ve müteveffâ-yı mezbûrun li eb ve üm karındaşı oğlu ve vârisi olan Emrullah b. İsa nâm kimesneler meclis-i şer‘-i eş-şerîf şâmihü’l-imâd ve mahfilü’d-dîn-i münîf-i râsihü’l-evtâdda hâfız-ı hâze’l-kitâbi’l-müstetâb fahrü’l-emâcid ve’l-ekârim Behram Kethüdâ b. Abdülkerim kıbelinden husûs-ı âti’z-zikri tasdîka fahrü’l-cüyûş Hüseyin Çavuş b. Kasım ve Bayram Çavuş b. Ali nâm kimesneler şehâdetleri ile şer‘an vekâleti sâbite olan Mustafa Bey b. Mehmed mahzarında bi’l-asâle ve’l-vekâle bi’t-tav‘ ve’r-rızâ ikrâr-ı sahîh-i şer‘î ve i‘tirâf-ı sarîh-i mer‘î kılıp Kasımpaşa demek ile ma‘rûf olan mevzi‘de vâki‘ hudûdunun bir tarafı fahrü’l-cüyûş Abdi Çavuş mülküyle ve iki tarafı tarîk-i âm ile ve bir tarafı Dağnik? nâm zimmî mülküyle ve tarîk-i âm ile mahdûd ve mümtâz iki bâb beyt-i ulvîyi ve bir ıstablı ve bir ayazmayı ve bir bağ ve eşcâr-ı müsmire ve gayr-ı müsmireyi ve muhavvatayı ve mahdûd-ı mezkûr hâricinde vâki‘ hudûdunun bir tarafı vâdi ve etrâf-ı selâsesi tarîk-i âm ile mahdûd olup her sene merhûm-ı mağfûrun leh Sultan Bayezid vakfına iki yüz on iki akçe mukāta‘a ile mutasarrıf olduğu otuz bir dönüm arz-ı hâliye[yi] müştemil olan menzili alâ müddetin tevâbi‘ ve levâhıkı ile kâffe-i menâfi‘ ile beynimizde ilm-i şer‘î ile ma‘lûm âlât-ı memlûkesiyle sûk-ı sultânîde beyne’t-tâlibîn ve’r-râgıbîn kirâren ve mirâren bey‘-i men yezîd olunup rağabât-ı nâs münkatı‘a olmağın otuz sekiz bin akçe karâr edip ziyâde ile âhar tâlibi olmamağın safka-i vâhide ile otuz sekiz bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip teslîm-i mebî‘ ve kabz-ı semen eyledik ba‘de’l-yevm mebî‘-i mezkûr[u] [22a] keyfe mâ yeşâ’ ve tahtâr tasarruf eylesin dediklerinde mukırrân-ı merkūmânın vech-i meşrûh üzre olan ikrârlarını vekîl-i merkūm Mustafa Bey bi’l-vekâle tasdîk ve tahkīk ettikden sonra mâ hüve’l-[v]âki‘ alâ vukū‘ihî bi’t-taleb ketb ve sebt olunup yed-i tâlibine vaz‘ ve def‘ olundu. Hurrire fi’l-yevmi’s-sâmin min şehri Zilka‘deti’ş-şerîfe sene hamse ve elf. Şuhûd: Kurd Çelebi b. Abdülcebbar, Memi Kapudân b. Abdullah, Hasan b. Abdullah tâbi‘-i Sancakdâr, Ali Kethüdâ b. Abdullah tâbi‘-i Sancakdâr-ı merhûm Ali Paşa, Memi Reis b. Küçük, Hasan Reis b. Abdülcebbar, İbrahim b. Abdullah, Tayyib Reis b. Ali Reis