Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 151 Hüküm no: 158 Orijinal metin no: [22a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Memi Paşa’nın evini Behram Kethüdâ’ya sattığı Emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm el-muhtas bi mezîdi inâyeti’l-meliki’l-allâm hâlen Şam Trablusu beyi olan Hazret-i Memi Paşa -belağahü’llâhü te‘âlâ mâ şâe- hazretleri meclis-i şer‘-i şerîf-i şâmihü’l-imâd ve mahfil-i dîn-i râsihü’l-evtâdda hâfız-ı hâze’l-kitâbi’l-müstetâb fahrü’l-emâcid ve’l-ekârim Behram Kethüdâ b. Abdülkerim mahzarında bi’t-tav‘ ve’r-rızâ ikrâr-ı sahîh-i şer‘î ve i‘tirâf-ı sarîh-i mer‘î kılıp bundan akdem sene ihdâ ve elf Muharremi evâhirinde mahmiye-i Galata hâricinde kasaba-i Beşiktaş mahallâtından Sinan Paşa mahallesinde vâki‘ hudûdunun bir tarafı İlyas b. Abdullah mülküyle ve bir tarafı Hasan b. Kasım mülküyle ve iki tarafı mekābir-i müslimîn ile mahdûd ve mümtâz olup yedi bâb fevkānî ve tahtânî beyti ve bir kileri ve bir fırını ve bi’r-i mâyı ve cüneyne ve üç kenîfi ve muhavvatayı müştemil olan mülk menzili altmış bin râyic fi’l-vakt akçeye bey‘-i bâtt-ı sahîh-i şer‘î ile bey‘ edip teslîm-i mebî‘ ve kabz-ı semen eyledim ba‘de’l-yevm menzil-i mezkûru mûmâ-ileyh Behram Kethüdâ keyfe mâ yeşâ’ ve tahtâ[r] tasarruf eylesin dedikde mukırr-ı mezbûrun kelimâtı vech-i meşrûh üzre olan ikrârlarını mukarrun lehü’l-merkūm vicâhen ve şifâhen tasdîk ve tahkīk ettikden sonra mâ hüve’l-vâki‘ alâ vukū‘ihî kayd olundu. Hurrire fi’l-yevmi’l-hâdî aşer min şehri Zilka‘deti’ş-şerîfe sene hamse ve elf. Şuhûd: Memi Kapudân eş-şehîr [bi]-Anaboltan?, Hacı Reis er-Reisü’s-sultânî, (…) Şaban Ağa er-Reisü’s-sultânî, es-Seyyid Abdullah er-Reisü’s-sultânî, Ahmed Ağa ez-Za‘îm, Ferhad Ağa ez-Za‘îm, Ali Ağa tâbi‘-i merhûm Hasan Paşa, Hacı Sefer ez-Za‘îm tâbi‘-i Süleyman Bey, Murad Ağa tâbi‘-i Keyvan Ağa