Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 157 Hüküm no: 168 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haydar Paşa Evkáfı’nın Mahmud Bey adlı sipahide alacağı olduğu Merhûm Haydar Paşa evkāfına mütevellî olan fahrü’l-akrân Sinan Bey b. Abdullah mahfil-i şer‘de kasaba-i Kasımpaşa mahallâtından el-Hâc Hasan mahallesinden olup bundan akdem vefât eden merhûm Mahmud Bey b. Ahmed nâm sipâhinin Âişe ve Fâtıma nâm sagīrlerine kıbel-i şer‘den mansûb vasiyyeleri olan Ümmühân Hâtun bt. Pîrî ve müteveffâ-yı mezbûrun zevcesi ve vârisesi olan Sâliha Hâtun bt. es-Seyyid Ali cânibinden husûs-ı âti’z-zikre Ali Çelebi b. el-Hâc Nasuh ve Mehmed Çelebi b. Nurullah şehâdetleri ile şer‘an vekâleti sâbit olup vekîl-i şer‘îsi olan mezbûre Ümmühân Hâtun mahzarında takrîr-i merâm edip bi’l-fi‘l mütevellîsi olduğum Haydar Paşa evkāfından mezkûr Mahmud Bey zimmetinde on üç bin akçe vard[ır] tevliyyetim hasebiyle muhallefâtından taleb ederin dedikde gıbbe’s-suâl ve akībe’l-inkâr mütevellî-i merkūmun takrîrine mutâbık beyyine taleb olundukda el-Hâc Mehmed b. Mahmud ve Cafer Çelebi b. Siyâmi ve Mehmed b. Sinan nâm kimesneler li ecli’ş-şehâde mahfil-i şer‘a hâzırûn olup istişhâd olundukda fi’l-vâki‘ merkūm Mahmud Bey bizim huzûrumuzda mûmâ-ileyh Haydar Paşa evkāfından zimmetinde vâcibü’l-edâ ve lâzımü’l-kazâ on üç bin akçe deynim vardır deyû ikrâr eyledi biz bu husûsa şâhidleriz şehâdet-i şer‘iyye dahi ederiz deyû edâ-i şehâdet-i şer‘iyye ettiklerinden sonra mütevellî-i merkūm meblağ-ı mezkûru küllen ve ba‘zan asâleten ve vekâleten almayıp ve havâle etmeyip ve bi vechin mine’l-vücûh zimmetini ibrâ etmediğine istihlâf olunup yemîn billâh ettiklerinden sonra meblağ-ı merkūm müteveffâ-yı mezbûrun muhallefâtından edâya hükm olunup mâ vaka‘a kayd şüd. Tahrîren fî evâili şehri Zilka‘deti’ş-şerîfe sene hamse ve elf. Şuhûd: İsa Halîfe b. el-İmâm, Mehmed Çelebi el-Müezzin, Mehmed Bey b. Ahmed, Hasan b. Nuh, Mehmed b. Yusuf ve gayruhüm