Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 160 Hüküm no: 174 Orijinal metin no: [24a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Reis’in evdeki hissesini Haydar b. Abdullah’a sattığı Budur ki Hâric-i Galata’da kasaba-i Kasımpaşa mahallâtından Surûrî mahallesinde bundan akdem vefât edip verâseti bir ammi oğlunun oğlu ile zevcine münhasıra olan Âişe bt. Mehmed nâm müteveffâtın ammisinin oğlu oğlu ve vârisi Hüseyin Reis b. Hasan meclis-i şer‘de müteveffât-ı merkūmenin zevci Haydar b. Abdullah mahzarında tâyi‘an ikrâr ve i‘tirâf edip müteveffât-ı mezbûrenin mahalle-i mezbûrede bir cânibi Kalende[r] Reis mülküne ve bir cânibi Mümine Hâtun mülküne ve bir cânibi Tatar Mihriban mülküne ve bir cânibi tarîk-i hâssa müntehî olup bir beyt-i ulvî ile bir beyt-i süflî ve bir sofayı ve bi’ri mâyı ve eşcâr-ı müsmire ve gayr-ı müsmire[yi] müştemil bahçeyi ve bir evlek mikdârı arz-ı hâliyesini ve muhavvatayı müştemil olan mülk menzilinin nısf şâyi‘i bana ve nısf-ı âharı mezbûr Haydar’a irs-i şer‘ile intikāl edip ile’l-ân müşâ‘an mutasarrıflar idik hâlen benim hisse-i şâyi‘amı dahi mezbûr Haydar’a altı bin nakd-i râyic fi’l-vakt akçeye bey‘-i bâtt-ı sahîh ile bey‘ edip kabz-ı semen ve teslîm-i mebî‘ eyledim min ba‘d menzil-i mezbûr cemî‘ hudûd ve hukūku tarâik ve levâhıkıyla mezbûr Haydar’ın mülkü oldu keyfe mâ yahtâr mutasarrıf ola dedikde mukırr-ı merkūmu ikrâr-ı meşrûhunda ( ) mâ vaka‘a gıbbe’t-taleb kayd olundu. Cerâ zâlike ve hurrire fî evâhiri Muharrem sene sitte ve elf. Şuhûd: ( )