Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 160 Hüküm no: 173 Orijinal metin no: [24a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâle ait hissenin zabt edildiği Budur ki Mahmiye-i Galata ve tevâbi‘inde bi’l-fi‘l beytülmâli’l-hâs emîni olan fahrü’l-akrân Mehmed Çavuş b. Abdülmennân meclis-i şer‘de bundan akdem kasaba-i Kasımpaşa’da merhûm Yahya Kethüdâ mahallesinde vefât eden İbrahim Reis b. Mehmed’in zevcesi ve vârisesi Kamer bt. Abdullah mahzarında ikrâr ve takrîr-i merâm kılıp müteveffâ-yı mezbûr muhallefâtının rub‘undan mâ‘adâsı beytülmâle âid iken mezbûre hâtun cümle muhallefâta vaz‘-ı [yed] etmekle muhallefât-ı mezbûr ile mîrîye âid olan hakkı taleb ve kabz için cümle muhallefâtını hesâb ve kitâb eylediğimizde mezbûrenin hakkı olan rub‘undan gayrı beytülmâlin hakkı beş bin yedi yüz doksan idiği zâhir ve mütekarrir olmağın meblağ-ı merkūmu mîrî için alıp kabz ve zabt eyledim mezbûre hâtunda meblağ-ı merkūmeye [âid] bir akçe kalmadı dedikde mezbûre tasdîk ettikden sonra mezbûre hâtun dahi mezbûr emînin benim dahi rub‘ hissemden zimmetinde bir akçe ve bir habbe hakkım kalmadı deyû ikrâr edicek mâ hüve’l-vâki‘ bi’t-taleb kayd olundu. Cerâ zâlike fî evâhiri Muharrem sene sitte ve elf. Şuhûd: ( )