Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 162 Hüküm no: 176 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gabin davasında sulh olunduğu Budur ki Umdetü’l-muhadderât üsvetü’l-muvakkarât Âbide Hâtun bt. Mehmed meclis-i şer‘-i şerîfde hâmil-i hâze’l-kitâb umdetü’l-erbâbi’l-ahlâk üsvetü ashâbi’l-ikbâl Sefer Kethüdâ b. Abdülmüte‘âl mahzarında ikrâr ve takrîr-i merâm kılıp bundan akdem Havâss-ı Kostantıniyye tevâbi‘inden İkikaya nâm karyede vâki‘ dört tarafı tarîk-i âm ile mahdûd olan mülk çiftliğimi mûmâ-ileyh Sefer Kethüdâ’ya bey‘-i bât ile bey‘ etmeğe zevcim Mahmud Çelebi b. Ahmed’i vekîl etmişdim. Çiftlik-i mezbûr iki yüz bin akçe değer etmeğin mezbûr Mahmud Çelebi çiftlik-i mezbûru müşârün-ileyh Sefer Kethüdâ’ya yüz elli bin akçeye bey‘ eyleyip ve akçesini ahz ü kabz eyleyip bana îsâl ettikden sonra bey‘-i mezbûrede gabn-i fâhiş vardır deyû ben da‘vâ eylediğimde mezbûr Sefer Kethüdâ dahi benim için çiftliği bana yüz elli bin akçeye sen sattın deyicek ikrâra vekîl olmuşdur, hüccet-i bey‘de böyle mastûrdur bi’z-zât olan bey‘de şer‘an mu‘teber değildir deyû gabni inkâr etmekle mâbeynimizde münâza‘ât-ı şedîde ve muhâsamât-ı kesîre vâki‘ olmuş idi el-hâletü hâzihî beynimizde muslihûn tavassut eyleyip husûs-ı mezbûru yirmi beş bin akçelik nakid filori ve beş bin akçe kıymetli Sanevber nâm Rusiyye bir câriye ile sulh eyleyip ben sulh-ı mezbûru kabûl ve bedel-i sulh olan mezkûr filori ve câriyeyi meclis-i sulhda mezbûr Sefer Kethüdâ yedinden bi’t-tamâm ve’l-kemâl ahz ü kabz eyledikden sonra husûs-ı mezbûrede olan gabn da‘vâsından ve çiftlik-i mezbûr ve tevâbi‘i ve levâhıkı da‘vâsından fâriğa oldum ve zimmetini min külli’l-vücûh ibrâ-i âmm-ı mutlak ile ibrâ ve iskāt-ı hak eyledim ba‘de’l-yevm bu husûsda benden ya, ya vekîlimden husûmet ve da‘vâ sâdıra olur ise istimâ‘ olunmaya dediğinde mukırra-i mezbûreyi cemî‘ kelimâtında mezbûr Sefer Kethüdâ vicâhen tasdîk ettikden sonra mâ hüve’l-vâki‘ bi’t-taleb kayd olundu. Tahrîren fî evâili Muharrem sene sitte ve elf. Şuhûd: Mehmed Efendi b. Alâaddin el-İmâm ve’l-Hatîb bi Galata, Mehmed Çelebi b. el-Hâc Yusuf el-Müezzin, Mustafa Reis er-Reisü’s-sultânî, Ebûbekir Çelebi, Abdülkādir Hacı el-Müezzin