Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 165 Hüküm no: 179 Orijinal metin no: [25a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultanşah’ın, ölen Emine adlı çocuğun amcası ve vârisi olduğu Âti’z-zikr nakil hüccetinin zeylinde isimleri muharrer olan Kemal b. Hasan ve Hızır b. Mustafa nâm kimesneler meclis-i şer‘-i şerîfe hâzırân olup, Bölükbaşı merhûm Abdi Bey’in Emine nâm müteveffât sagīre kızının muhallefâtına vâzı‘-ı yed olan mahmiye-i Galata ve havâss-ı mahrûse-i Kostantıniyye’de vâki‘ beytülmâl-i hâssın emîni olan fahrü’l-akrân Mehmed Çavuş b. Abdullah nâm hasm-ı câhid mahzarında, vilâyet-i Anadolu-i ma‘mûrede vâki‘ Manyas kazâsı tevâbi‘inden Ören karyesinde sâkine hâmil-i kitâb Sultanşah b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘î-i mezbûr, sagīre-i mezbûrenin ammisi ve usûbet-i nesebiyye cihetiyle vârisidir. Şu cihetle ki müdde‘î-i mezbûr, sagīre-i merkūmenin babası Abdi Bey’in ana baba bir karındaşıdır. Her ikisi de karye-i mezbûrede vefât etmişlerdir. Verâseti ona ve Servinaz bt. Abdullah nâm anasına münhasıradır. Onlardan başka vâris ve terekesine müstahık kimesne ma‘lûmumuz değildir. Kazâ-i mezbûr kadısı mevlânâ Bostan Efendi b. Cafer’in imzâsıyla mümzâ, hatemiyle mahtûm ve zeyilde mezkûr senenin evâhir-i Muharrem târihiyle müverrah olan hüccet-i şer‘iyyenin vürûdundan ve mazmûnunun emîn-i mezbûr mahzarında zeyilde isimleri muharrer şâhidîn-i mezbûrînin şehâdetleri ile sâbit olmasından sonra şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike fî evâili Safer sene-i mezbûre. Şuhûd: Hüsrev [b.] Abdullah el-Muhzıru’l-kassâmî, Musli el-Muhzır, Abdurrahman b. Hayreddin, Ömer Efendi el-Müsta‘id, Muhyiddin Efendi el-Mu‘îd, Tayyib b. Pîrî el-Müsta‘id ve gayruhüm