Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 172 Hüküm no: 186 Orijinal metin no: [26b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cemile Hatun’un oğlunda ödünçten alacağı olduğu Şaban Bölükbaşı b. Abdullah ve İsa b. Abdullah nâm kimesneler meclis-i şer‘-i şerîfe hâzırân olup hâric-i mahmiye-i Galata mahallâtından Tomtom Memi mahallesinde sâkin iken bundan akdem Yanık seferinde fevt olan Mustafa Bey’in Âişe nâm sagīre kızına kıbel-i şer‘den mansûb vasî olan mevlânâ Mehmed Halîfe b. Mehmed nâm hasm-ı câhid mahzarında, müteveffâ-yı mezbûrun anası hâmiletü hâze’l-kitâb Cemile Hâtun bt. Ferhad’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müdde‘iye-i mezbûrenin, müteveffâ-yı merhûmun zimmetinde karz-ı şer‘î cihetinden lâzımü’l-edâ ve vâcibü’l-kazâ râyicü’l-vakt otuz bin akçe hakkı vardır. Bizim yanımızda ve katımızda ikrâr ve i‘tirâf etmişdir. Müdde‘iye-i mezbûreye meblağ-ı merkūmu müteveffâ-yı mezbûrdan hâl-i hayâtında kendisinden veya ba‘de vefâtihî muhallefâtından almadığına, bi vechin mine’l-vücûh ve sebebin mine’l-esbâb iskāt etmediğine dâir yemîn verildikden ve şâhidlerin şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber oldukdan sonra şehâdetleri mûcebince hükm edildi. Cerâ zâlike ve hurrire fî evâsıtı Safer sene sitte ve elf. Şuhûd: el-Mezbûrûn