Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 180 Hüküm no: 197 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ev ve bozahânenin satıldığı Budur ki Mahrûse-i Galata tevâbi‘inden Fındıklı’da vâki‘ Çizmecibaşı Tekyesi mahallesi sâkinlerinden zahrü’l-eşbâh Mehmed Çelebi b. Memişah meclis-i şer‘-i hatîr ve mahfil-i dîn-i lâzımü’t-tevkīrde işbu râfi‘-i hüccet-i şerîfe ve hâfız-ı vesîka-i münîfe olan efdalü’l-ulemâ ve’l-mevâlî ekmelü’l-fuzalâ ve’l-e‘âlî câmi‘u envâ‘i’l-mehâsin ve’l-eltâf hâmîü fünûni’l-mehâmid ve’l-e‘tâfe’l-mevle’l-celîlü’ş-şân ve’l-âlimü’r-refî‘i’l-mekân el-Müstağnî bi mekârimi ahlâk ve mehâsini ağrâk? an ta‘dâdi’l-elkāb ve teksîri’s-sıfât el-muhtas bi mezîdi inâyeti’l-meliki’l-kaviyyi’l-alî seyyidinâ ve senedinâ ve mevlânâ Hazret-i Mehmed Efendi tayyebe’llâhu ercâe’l-arzi bi tîbi şânihî neclü sadri’l-e‘âlî bedrü’l-mevâlî alâmetü asr ve zamânihî müftiyyü’l-memâliki’l-Osmaniyye bi’l-istihkāk fî evânihî hazret-i şeyh-i meşâyihü’l-islâm Mehmed Efendi lâ zâle zılûlü vücûdihî alâ mefâriki’l-leyâlî ve’l-eyyâm mâ şeyh mülk? ve şeyh mülk? cânib-i şerîflerinden tasdîk-i âti’z-zikre fahrü’l-müderrisîn mevlânâ Abdülkerim Efendi b. Şeyh Yusuf ve zahrü’l-müsta‘idîn mevlânâ Ömer Çelebi b. Mehmed şehâdetleriyle hasm-ı câhid mahzarında şer‘an vekâleti sâbite olan fahrü’l-cüyûş Hüseyin Çavuş mahzarında ikrâr-ı sahîh-i şer‘î edip merhûm ve mebrûr dârende-i medâric-i rahmet-i rabb-i gafûr Sultan Bayezid Han hazretlerinin evkāfından olup taht-ı tasarrufumda olup tûlen kırk beş zirâ‘ arz-ı hâliye üzerinde binâ olunup mahalle-i merkūmede kıbleten bahr ile ve şarkan yine kendi tasarrufumda olan arz-ı hâliye emâmında olan bahr ile ve garben Rıdvan Ağa mülküyle ve şimâlen tarîk-i âm ile mahdûd olup mülk-i mevrûsumuz olan iki bâb tahtânî evi ve bir bozahâneyi âmme-i merâfıkı ve cemî‘-i tevâbi‘i ve levâhıkı ile mûmâ-ileyh Mehmed Efendi’ye kırk bin nakd-i râyic fi’l-vakt akçeye bey‘-i bâtt-ı sahîh-i şer‘î ile bey‘ edip kabz-ı semen ve teslîm-i mebî‘ eyledim deyip mukırr-ı mezbûru ikrârında vekîl-i mezbûr vicâhen tasdîk ettikden sonra yine bâyi‘-i mezbûr vekîl-i merkūm mahzarında arz-ı merkūmenin hakk-ı tasarrufunu cânib-i vakfa olan bin beş akçe mukāta‘asını mütevellî-i vakf olan fahrü’l-emâcid Osman Efendi’den me’hûz olduğumdan sonra müvekkil-i mûmâ-ileyh hazretlerine tefvîz edip onlar dahi kabz ve tefevvuz ettikden sonra mukābele-i tefvîzde müvekkil-i mûmâ-ileyhden nakd-i mezbûr on bin nakid akçesini alıp kabz eyledim dedikde mukırr-ı mezbûru cemî‘ kelâmında vekîl-i merkūm dahi şifâhen tahkīk edicek bu hurûf-ı şâriha alâ mâ hüve’l-hakīka ketb olundu. Tahrîren fî evâsıtı şehri Evveli’r-Rebî‘ayn sene sitte ve elf min hicreti men lehü’l-izzü ve’ş-şeref. Şuhûdü’l-hâl: ( )