Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 181 Hüküm no: 198 Orijinal metin no: [28b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Cafer ve kardeşi Haydar Bey’in, Ali Bey’in amcazâdeleri ve vârisi oldukları Vilâyet-i Anadolu-i ma‘mûrede vâki‘ Ürgüp kasabası müvellâsı mevlânâ Ali b. Mustafa’nın meclisinden verilen, onun hatemiyle mahtûm, zeyilde mezkûr senenin evâhir-i Saferi târihiyle müverrah ve mazmûnu her biri kasaba-i mezbûre tevâbi‘inden Babayani karyesinde sâkin olan Mustafa Fakīh b. Seyyid Ahmed ve Ali b. Abdullah ve Hasan b. Abdullah ve Nebi el-Hüdâverdi nâm kimesnelerin şehâdetlerini müştemil ve karye-i mezkûre sükkânından hâmilü’l-kitâb el-Hâc Cafer b. Kimyanos er-Râcil’den asâleten, karındaşı Haydar Bey kıbelinden âti’z-zikr da‘vâ ve isbâta vekîl olarak vekâleten sâdır olan da‘vâ-yı sahîha-i şer‘iyyede gıbbe’l-istişhâd şehâdetlerini hâvî hüccet-i şer‘iyye vârid oldukda görüldü ki mezbûr Cafer Bey ve müvekkili Haydar Bey, hâric-i Galata mahallâtından Tomtom Memi mahallesinde bundan akdem fevt olan ve muhallefâtı Râziye nâm sagīreye vasiyy-i muhtâr olan Bayram b. Mustafa ve sâir veresesi yediyle zabt edilen Ali Bey b. İnebey’in ve karındaşı, Tımışvar’da fevt olan Ahmed Bey b. İnebey er-Râcil nâm müteveffânın ammizâdeleri ve vârisleridir. Şu cihetle ki müdde‘î-i mezbûrun babası ve müvekkil-i mezbûr Kimyanos müteveffiyeyn-i mezbûreynin ana baba bir karındaşıdır. Ali Bey’in verâseti ikisine, kızı Râziye’ye ve Rahime bt. Hüsrev ve Şirin bt. Abdullah nâm zevcelerine münhasırdır. Onlardan başka vâris ve terekesine müstahık kimesne ma‘lûmumuz değildir. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber oldu. Mezbûr Bayram ihzâr edildi ve hüccet-i şer‘iyye yüzüne okundu. Vasiyy-i mezbûrun hüccet-i şer‘iyyenin müvellâ-yı mezkûrdan vürûdunu inkâr etmesinden sonra vasiyy-i merkūmun mahzarında, isimleri şuhûd-ı tarîk mahallinde zeyl-i kitâbda muharrer olan Süleyman b. İbrahim ve Hasan b. Abdullah nâm kimesneler hüccet-i şer‘iyyenin müvellâ-yı mezkûrdan sâdır olduğuna, kendi yanlarında okunduğuna, hüccetin üzerindeki mührün onun mührü olduğuna şehâdet ettiler. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince verâsetine hükm edildi. İşbu hüküm, mezbûr Ali Bey’in hâl-i hayâtı ve kemâl-i akl ve sıhhatinde onların ammizâdeleri olduğunu vasiyyet ettiğinin, sikātdan cemm-i gafîrin ihbârıyla zâhir olup tebeyyün etmesinden sonra vâki‘ oldu. Cerâ zâlike ve hurrire fî evâhiri Rebî‘ilevvel sene sitte ve elf. Şuhûd: Yusuf b. Abdullah el-Müderris, Mehmed b. Şaban el-Mülâzım, Ramazan b. Mehmed el-Cündî, Veli b. Müstecâb, …, Mahmud Çelebi el-İmâm, Emir Efendi el-Müezzin