Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 182 Hüküm no: 199 Orijinal metin no: [29a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa adlı çocuğun Süleyman b. Hayreddin’in yeğeni ve vârisi olduğu Hasan Reis b. Abdullah ve Mustafa Reis b. Hüseyin nâm kimesneler meclis-i şer‘-i şerîf ve mahfil-i dîn-i münîfe -el-masûn ani’t-tağyîr ve’t-tahrîf- hâzırân olup âti’z-zikr müteveffânın anası ve vârisi olan Rûşen bt. Abdullah kıbelinden husûs-ı âti’z-zikre vekâleti nehc-i şer‘î üzre sâbit olan el-Hâc Hasan b. Abdullah nâm hasm-ı câhid mahzarında, Mehmed b. Mustafa nâm sagīre kıbel-i şer‘den mansûb vasî olan el-Hâc Hasan b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki sagīr-i mezbûr, dâhil-i mahmiye-i Galata mahallâtından el-Hâc A‘mâ mahallesinde bundan akdem fevt olan ve muhallefâtı mezbûre Rûşen tarafından zabt edilen Süleyman b. Hayreddin nâm müteveffânın karındaşının oğlu ve usûbet-i nesebiyye cihetiyle vârisidir. Zira sagīr-i mezbûrun babası Mustafa, müteveffâ-yı merkūmun ana baba bir karındaşıdır. Verâseti ikisine münhasırdır. İkisinden başka vâris ve terekesine müstahık kimesne ma‘lûmumuz değildir. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince sagīr-i mezbûrun verâsetine hükm edildi. Cerâ zâlike ve hurrire fî evâhiri Rebî‘ilevvel sene sitte ve elf. Şuhûd: Pîr Mehmed b. Mehmed el-İmâm, Mahmud b. Mehmed es-Seyyid, Mahmud Çelebi el-âhar el-Müezzin, Mehmed el-Muhzır, Hüsrev b. Abdullah