Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 185 Hüküm no: 202 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihri Hatun’un evini Yakub Kethüdâ Evkáfı’na istiğlâl yoluyla sattığı Bundan akdem hâric-i Galata’da Kalafatçıbaşı mahallesinde vefât eden Dellâl Memi b. Mustafa nâm müteveffânın veresesinden zevcesi Mihri Hâtun bt. Abdullah meclis-i şer‘-i şerîfde merhûm Yakub Kethüdâ evkāfı’na bi’l-fi‘l mütevellî olan Mustafa Bey b. Abdullah nâm kimesne mahzarında bi’t-tav‘ ve’r-rızâ ikrâr ve i‘tirâf edip zevcim müteveffâ-yı mezbûr hâl-i hayâtında mütevellî-i merkūm yedinden vakf-ı mezkûrun nukūdundan dokuz bin akçe istikrâz edip zimmetinde altı bin akçe deynini def‘aten edâ edip bâkī vakfa üç bin akçe deyni kalmışdır meblağ-ı merkūm üç bin akçeyi ben kendi malımdan edâ etmeğe müte‘ahhide oldum hâlen mahalle-i mezbûrede vâki‘ bir cânibi Hamza vakfıyla ve bir cânibi Kurd Hüseyin Bey vakfıyla ve bir cânibi Emine bt. Hamza mülküyle ve bir cânibi tarîk-i âm ile mahdûd iki beyt-i ulvîyi müştemil menzilimi merkūm üç bin akçeye vakf-ı mezbûra istiğlâl için bey‘ edip ba‘dehû târih-i kitâbdan sene tamâmına varınca iki yüz akçeye istîcâr eyledim dedikde mukırr-ı merkūmu ikrâr-ı meşrûhunda mütevellî-i mezbûr vicâhen ve şifâhen tasdîk ve tahkīk eyledikde mâ hüve’l-vâki‘ gıbbe’t-taleb tahrîr olundu. Cerâ zâlike ve hurrire fi’l-yevmi’l-ışrîn min Rebî‘ilevvel sene sitte ve elf. Şuhûdü’l-hâl: El-Hâc Piyâle b. Abdullah, Hasan b. Mustafa, Abdullah b. Bayram, Arsız? Hasan b. Abdullah, Kurd el-Hâc Mehmed b. Abdullah ve gayruhüm