Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 189 Hüküm no: 210 Orijinal metin no: [30b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beytülmâle intikal eden bahçenin müzâyede ile Fâtıma Hatun’a satıldığı On üçüncü yayabaşı bölüğünden olup dâhil-i mahmiye-i Galata mahallâtından Yolcuoğlu mahallesinde bundan akdem fevt olan merhûm Ahmed b. Ali nâm râcilin muhallefâtına vâzı‘-ı yed bulunan râcilîne müte‘allik beytülmâlin emîni umdetü’l-emâcid ve’l-ekârim ve’l-ekâbir ve’l-e‘âzım Mehmed Subaşı b. Cafer kıbelinden âti’z-zikr bey‘i ikrâra ve kabz-ı semene vekâleti bimâ hüve nehcü’s-sübût şer‘an sâbit olan Hüseyin Bey b. Abdullah nâm râcil meclis-i şer‘-i şerîfe hâzır olup, müvekkil-i mezbûrun, müteveffâ-yı merkūmun muhallefâtında bulunan, kasaba-i mezbûre mahallâtından Küçük Piyâle Paşa mahallesinde kâin, iki beyt-i ulvîyi, bir beyt-i süflîyi, gölgeliği, helâyı, su kuyusunu, eşcâr-ı müsmire ve gayr-ı müsmireyi hâvî, üç tarafdan vâdi ve tarîk-i âm ile, diğer tarafdan müşteriye-i mezbûre mülkü ile mahdûd olan cemî‘ bahçesini cümle tevâbi‘ ve levâhıkı ve âmme-i menâfi‘ ve merâfıkı ile râyicü’l-vakt yirmi dört bin iki yüz akçe semen-i mu‘ayyen-i makbûz ile hâric-i mahmiye-i mezbûre müzâfâtından Kasımpaşa mahallâtından Yeldeğirmeni mahallesinde sâkine olan fahrü’l-muhadderât Fâtıma Hâtun bt. Sinan kıbelinden şirâ ve def‘-i semene vekâleti Memi Bey b. Abdullah el-Kapudân ve İbrahim Çelebi b. Ferhad er-Reisü’s-sultânî nâm kimesnelerin şehâdetleri ile sâbit olan vekîl hâmil-i kitâb Ahmed Hoca b. Abdullah’a îcâb ve kabûlü hâvî bey‘-i bâtt-ı sahîh ile bey‘ ettiğini ikrâr eyledi. Vâki‘ ikrâr müşterî-i mezbûr tarafından bi’l-muvâcehe tasdîk edildi. İşbu mübâya‘a mebî‘-i mezbûrun mecâlis-i tâlibîn ve mehâfil-i râgıbîne bey‘ maksadıyla iki ay müddetince mirâren ve kirâren arz olunmasından ve başka tâlib-i olmayıp semen-i mezkûrla müşterî-i mezbûr üzerinde tekarrür eylemesinden sonra vâki‘ oldu. Cerâ zâlike ve hurrire fî evâsıtı Rebî‘ilâhir sene sitte ve elf. Şuhûd: Hamza Çelebi b. Haydar er-Reisü’s-sultânî, Ömer Çelebi b. Hürrem er-Reisü’s-sultânî, Mehmed Çelebi b. Yusuf el-Müezzin, Üstâd Murad b. Abdullah, Musa b. Mustafa, Hasan b. Abdullah el-Münâdî, el-Hâc Hüseyin b. Abdullah el-Müezzin, Abdülkādir b. Hacı Hoca el-Müezzin, Mustafa Çelebi b. Elvan er-Reisü’s-sultânî ve gayruhüm