Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 190 Hüküm no: 211 Orijinal metin no: [31a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miras payının alındığı Bundan akdem hâric-i Galata’da Tophâne mahallâtından Tomtom Memi mahallesinde vefât eden Ali Beşe b. Abdullah nâm bevvâb-ı sultânînin veresesinden ammisi oğulları el-Hâc Cafer b. Abdullah er-Râcil ve Haydar b. Abdullah nâm kimesneler müteveffâ-yı merkūmun sagīre kızı Râziye’nin vasiyy-i muhtârı olan Bayram Sofu b. Mustafa nâm kimesne mahzarında ikrâr-ı sahîh-i şer‘î edip müteveffâ-yı merkūmun Ali Beşe’nin vefâtından mukaddem vefât eden karındaşı Ahmed Beşe’nin muhallefâtına vâzı‘ü’l-yed ve sagīre kızı Sâliha’ya vasî olan Mehmed b. Abdullah el-Bevvâbü’s-sultânî nâm kimesneden mezbûr Ali Beşe’nin hâl-i hayâtında hisse-i şer‘iyyesini taleb ve kabza mahalle-i mezbûre [i]mâmı Mahmud Çelebi’yi vekîl edip ol dahi vekâleten muhallefât-ı mezbûreden mezbûr Ali Beşe’nin hisse-i şer‘iyyesini vasiyy-i mezbûr Mehmed yedinden bi’t-tamâm ve’l-kemâl ahz ü kabz edip kat‘-ı alâka ve fasl-ı husûmet oldukdan sonra nice zamândan sonra merkūm Ali Beşe dahi mezbûr Bayram Sofu’yu vasiyy-i muhtâr edip vefât eyledikde mezbûr Bayram muhallefâtına vâzı‘ü’l-yed olmağla biz dahi mezkûr Bayram’ın yedinden hisse-i şer‘iyyemizi bi’t-tamâm ve’l-kemâl ahz ü kabz eyledik mezbûr Ahmed Beşe’nin muhallefâtından ve merkūm Ali Beşe’nin muhallefâtından bir akçe ve bir habbe hakkımız kalmadı min ba‘d mezbûr Ahmed Beşe ve Ali Beşe’nin muhallefâtına müte‘allik taleb ve da‘vâ edersek istimâ‘ olunmaya dediklerinde mukırrân-ı merkūmânı kelimât-ı meşrûhalarında vasiyy-i mesfûr Bayram Sofu vicâhen ve şifâhen tasdîk ve tahkīk eyledikde mâ vaka‘a vukū‘u üzre bi’t-taleb tahrîr olundu. Hurrire fi’t-târihi’l-mezbûr. Şuhûd: Mevlânâ Yusuf Efendi b. Abdullah, Rıdvan [b.] Abdullah, Receb b. Seyfi, Ali er-Reisü’s-sultânî, Hüsrev [b.] Abdullah ve gayruhüm