Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 191 Hüküm no: 212 Orijinal metin no: [31b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nafaka bedelinin alındığı Bundan akdem mahmiye-i Galata hâricinde Tophâne mahallâtından Ebülfazl mahallesinde vefât eden Râziye bt. Ferhad’ın sulbiye kızı ve vârisesi Belkıs nâm sagīrenin ceddesi ve kıbel-i şer‘den mansûbe vasiyyesi olan Kamer Hâtun bt. Abdullah meclis-i şer‘-i şerîfde müteveffâ-yı mezbûrenin vefâtından altı sene sonra vefât eden sagīre-i mezbûrenin babası merhûm Mehmed Reis b. Mehmed’in veresesinden vâlidesi ve diğer sulbiye kızı ve vârisesi Rahime nâm sagīrenin vasiyyesi olmağla muhallefâtına vâzı‘ü’l-yed olan diğer Kamer Hâtun muvâcehesinde ikrâr ve takrîr edip mezbûre Belkıs’ın vâlidesi mezkûre Râziye’nin muhallefâtı beyne’l-verese kısmet olundukda mezbûre Belkıs’ın hisse-i şer‘iyyesine iki bin akçe düşüp ve hâkimü’ş-şer‘ mezbûre Belkıs’ın nafaka ve kisvesiyçün yevmî iki akçe ta‘yîn ve takdîr edip zikr olunan altı senede üç bin dört yüz kırk akçe olup hisse-i mezbûre harc olundukdan mâ‘adâ bin dört yüz kırk akçe izn-i şer‘le istidâne etmişdim el-hâletü hâzihî mezbûr Mehmed Reis’in muhallefâtından meblağ-ı merkūm bin dört yüz kırk akçeyi mezkûre vâzı‘ü’l-yed Kamer Hâtun’un yedinden bi’t-tamâm ve’l-kemâl ahz ve kabz eyledim mezbûr nafaka-i merkūmeye müte‘allik da‘vâ ve nizâ‘ım kalmadı dedikde mukırra-i merkūmeyi ikrâr-ı meşrûhunda mukarrun lehâ-yı mesfûre vicâhen ve şifâhen tasdîk ve tahkīk eyledikde mâ vaka‘a bi’t-taleb tahrîr olundu. Cerâ zâlike ve hurrire fi’t-târihi’l-mezbûr. Şuhûd: Behram Ağa [b.] Abdullah, Hasan [b.] Abdullah, Süleyman [b.] Mehmed, Mustafa Reis [b.] İbrahim, el-Hâc Hasan [b.] Şaban