Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 196 Hüküm no: 218 Orijinal metin no: [32b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mirasın taksîmi Bundan akdem kasaba-i Kasımpaşa’da Câmi‘-i Kebîr mahallesinde vefât edip verâseti kızları Âişe ve Fâtıma ve oğlu Mehmed’e ve zevcesi Kamer Hâtun’a münhasıra olan Mehmed Bey b. Ömer nâm topçunun muhallefâtından mahalle-i mezbûrede vâki‘ ma‘lûmü’l-hudûd olup on dokuz bin üç yüz akçeye takvîm olunan menzilinde oğlu mezbûr Mehmed Çelebi’nin hissesine yedi bin sekiz yüz akçe düşüp mezbûre Kamer’e dahi beş bin akçe düşüp mâ‘adâsı zikr olunan kızların olup iştirâk üzre tasarruf olunurken mezbûr Mehmed Çelebi dahi vefât edicek verâseti sagīre kızları Belkıs ve Rahime ve kız karındaşları mezbûretân Âişe ve Fâtıma’ya ve anası mezbûre Kamer’e bin iki yüz elli akçe düşüp beş bin akçe dahi kızlara düşüp sekiz yüz akçe dahi zevcesi mezbûre Âişe’ye düşüp on dokuz bin üç yüz akçe hesâbı üzre kızların ve ananın ve zevcenin hisselerinden mâ‘adâ olan yedi bin üç yüz yirmi akçesi zikr olunan Âişe ve Fâtıma’nın hakkı oldukdan sonra mezbûretân Âişe ve Fâtıma ve zevce-i mezbûrenin menzil-i [33a] merkūmda olan sekiz yüz akçe hissesini kendi mallarından verip her birine dörder yüz akçeden dahi evde hisseleri olup ba‘de küllî hesâb ve kitâb mezbûretânın hâlen menzil-i merkūmda sekiz bin üç yüz yirmi akçe hisseleri mütehakkik olup her birine evde dört bin yüz altmış akçe hisseleri var idiğin sâir verese tasdîk edicek mâ hüve’l-vâki‘ bi’t-taleb sebt olundu. Tahrîren fî evâsıtı Rebî‘ilâhir sene sitte ve elf. Şuhûd: Behram Ağa b. Abdullah, Mustafa er-Reis, Bayram [b.] Mustafa, el-Hâc Hasan [b.] Şaban, Hasan Çelebi Takyeci ve gayruhüm