Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 198 Hüküm no: 221 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vakıf lehdarlarının beyanı Budur ki Bundan akdem hâric-i Galata’da merhûm Bedreddin Bey mahallesinde olup müteveffâ olan Kasımi b. Abdullah nâm dümenci hâl-i hayâtında vakf eyleyip mahalle-i mezbûrede vâki‘ dört süflî ve bir ulvî evleri ve fırını ve bi’r-i mâyı müştemil olan bir cânibi merhûm-ı mezbûrun bahçesi ve bir cânibi mezar-ı müslimîn ve bir tarafı merhûm Bayezid Halîfe mezarı ile mahdûd olup süknâsı kendiye ba‘dehû evlâdına ve evlâd-ı evlâdına ba‘dehûm utekāsına ve evlâd-ı utekāsına meşrût olan menzilde hâlen mevkūfun-aleyhim ve meşrûtan-ileyhim olan utekāsından Fâtıma bt. Bayram ve diğer Fâtıma bt. Hasan ve Sâliha bt. Mehmed nâm hâtunlar taraflarından husûs-ı âti’z-zikre vekîlleri olan mezbûre Fâtıma’nın babası Hasan b. Abdullah meclis-i şer‘-i şerîfde hâzır olup vech-i meşrûh üzre kendilerine vakf olan menzil-i mezbûrun sene hamse ve sittîn ve tis‘a mi’e Cumâdelûlâsı ile müverrah vakfiye-i ma‘mûlün-bihâ ibrâz eylediklerinden sonra şöyle takrîr-i merâm eylediler ki menzil-i mezbûrun büyût semeresi hâlen bize meşrût olmağın cümlemiz müşâ‘ ve müşterek tasarruf edecek olduk cümlenin ribhinden şart-ı vâkıf üzre Galata’da Câmi‘-i Kebîr’de imâm olan kimesneye rûh-ı vâkıf-ı mezbûra her sene bir hatm-i şerîf tilâvet etmek üzre yılda altmışar akçe verdiğimizden sonra vakf-ı mezbûru üçümüz ittifâkıyla her nice istersek mutasarrıf olacak olduk dediklerinde mezbûrların kelâm-ı meşrûhu talebleriyle kayd olundu. Cerâ zâlike ve hurrire fî evâhiri Rebî‘ilevvel sene sitte ve elf. Şuhûd: Seyyid Abdurrahman b. Seyyid Sefer, Seyyid Hızır b. Seyyid Sefer, Rıdvan b. Abdullah, Seyyid Ali b. Mehmed, Ali b. İbrahim el-Müezzin, Seyyid Mehmed b. Abdurrahman, İbrahim b. Habib, Hacı Yusuf b. Abdullah