Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 199 Hüküm no: 222 Orijinal metin no: [33b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mehmed’in Rus asıllı câriyesini azat ettiği Mahmud Çelebi b. Kara Kılıç ve el-Hâc Hasan b. Abdullah meclis-i şer‘-i şerîfe hâzırân olup mahmiye-i Galata mahallâtından Yolcuoğlu mahallesinde bundan akdem fevt olan Âişe bt. Mehmed nâm hâtunun ammisi ve usûbet-i nesebiyye cihetiyle vârisi olan ve müteveffât-ı mezbûrenin vasiyyetlerini tenfîze vasiyy-i muhtârı bulunan Hamamcızâde deyû ma‘rûf fahrü’l-a‘yân Ahmed Çavuş nâm hasm-ı câhid mahzarında, orta boylu, açık kaşlı, gök gözlü, Rusiyyetü’l-asl hâmiletü hâze’l-kitâb Mehlika bt. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffât-ı mezkûre hâl-i hayâtı ve kemâl-i akl ve sıhhatinde, taht-ı mülkünde bulunan müdde‘iye-i merkūmeyi hasbeten lillâhi’l-azîm ve taleben li merzâtihî âzâd ve tahrîr etti. Câriye-i mezkûre bu sûretle sâir harâir-i asliyyât-ı mükellefât gibi hürre oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hürriyetine hükm edildi. Cerâ zâlike ve hurrire fî evâhiri Rebî‘ilâhir sene sitte ve elf mine’l-hicreti’n-nebî. Şuhûd: Hasan b. Abdurrahman, Mehmed Reis b. Abdullah, Mustafa b. Mehmed, Sinan Reis b. Abdullah, Abdülkādir b. Kurd, Mehmed [b.] Hüsrev ve gayruhüm