Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 208 Hüküm no: 231 Orijinal metin no: [35b-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan Hatun’un vasiyeti Mustafa Çelebi b. Muharrem ve Tesbihçizâde deyû ma‘rûf Mehmed Çelebi b. Mahmud ve Ebî Eyyûb-i Ensârî hazretleri -aleyhi rahmetü’l-meliki’l-Bârî- mahallâtından merhûm Takyecibaşı mahallesi müezzini Hüseyin b. Yahya nâm kimesneler meclis-i şer‘-i şerîfe hâzırûn olup, mahalle-i mezbûrede bundan akdem vefât eden İsmihan Hâtun bt. İlyas nâm hâtunun kız karındaşı ve vârisi olan yine mahalle-i mezbûreden Hatice Hâtun bt. İlyas nâm hasm-ı câhid mahzarında, müteveffât-ı mezbûrenin sülüs-i cemî‘-i mâlının tesviye-i umûruna vasiyy-i şer‘î olan hâmil-i hâze’l-kitâbi’ş-şer‘î Derviş Çelebi b. Mehmed’den vesâyeti hasebiyle sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffât-ı mezkûre hâl-i hayâtı ve kemâl-i akl ve sıhhatinde, cemî‘ sülüs-i mâlını vasiyyet etti ve ecel erişip rabbine kavuştuğunda sülüs-i mâlının vasiyy-i mezbûr yediyle ifrâz edilmesini ve Havâss-ı mahrûse-i Kostantıniyye müvellâsı mevlânâ Ahmed Efendi [b.] Davud’un imzâsı ile mümzâ ve 1002 senesi evâil-i Receb-i müreccebi târihiyle müverrah vasiyyetinde de yazdığı üzre vücûh-i hayrâta ve sunûf-i meberrâta sarf edilmesini şart eyledi. Vasiyyetinin tenfîzine de el-Hâc Behram b. Abdullah’ı vasî seçdi ve vasiyyeti üzre vefât etti. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hükm edildi. Cerâ zâlike ve hurrire fî evâili Cumâdelûlâ sene sitte ve elf. Şuhûdü’l-hâl: Ali Bey el-Mütevellî, İbrahim Çelebi Kâtib, Mehmed b. Sinan el-Kâtib bi Eyüb, Keyvan b. Abdullah er-Râcil, Pîr Ahmed b. Hüseyin, Şehsüvar b. Mehmed, Ahmed Çelebi el-Kassâm bi Eyüb, Mehmed Çelebi Kâtib-i Eyüb, İbrahim Arabî ve gayruhüm