Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 217 Hüküm no: 244 Orijinal metin no: [38a-3, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Ali adlı çocuğa babasının vasî atadığının ortaya çıktığı El-Hâc Ahmed b. Mahmud ve Mehmed b. İlyas nâm kimesneler meclis-i şer‘-i şerîfe hâzırân olup hâric-i mahmiye-i Galata mahallâtından İskender Paşa mahallesinde bundan akdem fevt olan merhûm Ali’nin Mustafa nâm sagīr oğluna kıbel-i şer‘den mansûb vasî olan Âişe bt. Bayram nâm hasm-ı câhid mahzarında, baltacıyân tâifesinden hâmil-i hâze’l-kitâb Mahmud b. Abdullah’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet ettiler ki müteveffâ-yı mezbûr hâl-i hayâtı ve kemâl-i akl ve sıhhatinde sagīr-i mezkûra vefâtından sonra muhallefâtından irs-i şer‘le kendisinden intikāl edecek emvâlin zabtı ve hıfz-ı ahvâli için evân-ı rüşd ve zamân-ı bülûğuna kadar müdde‘î-i mezkûru vasiyy-i mansûb seçdi. O da vesâyet-i mezbûreyi kabûl edip hizmet-i lâzımesini edâyı müte‘ahhid oldu. Şehâdetleri ba‘de ri‘âyeti şerâiti’l-kabûl inde’ş-şer‘ makbûl ve mu‘teber olmağın mûcebince hâkim müdde‘î-i mezbûrun vasîliğine hükm etti. Cerâ zâlike ve hurrire fi’t-târihi’l-mezbûr. Şuhûd: Hüsrev b. Abdullah, İdris Çelebi b. Yusuf, Mehmed b. Yusuf, Mustafa Ali, Hasan Rıdvan ve gayruhüm