Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 217 Hüküm no: 245 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terekenin rıza ile taksîm olunduğu Bundan akdem kasaba-i Kasımpaşa’da Surûrî Çelebi mahallesinde fevt olup verâseti li ebeveyn kız karındaşı Selimşah’a ve zevcesi Râziye bt. Hüsrev’e münhasıra olan Dardağanoğlu demekle ma‘rûf Mehmed Reis b. Mustafa’nın [kız] karındaşı ve vârisesi mezbûre Selimşah tarafından husûs-ı âti’z-zikre nehc-i şer‘î üzre Nasuh b. Minnet ve Ali b. Abdullah şehâdetleri ile vekâleti sâbite olan fahrü’l-akrân Hüseyin Çavuş b. Ali meclis-i şer‘-i şerîfde müteveffâ-yı mezbûrun zevcesi mezbûre Râziye mahzarında ikrâr ve takrîr-i merâm edip müteveffâ-yı mezbûrun cemî‘ muhallefâtı bey‘ olunup techîz ve tekfîn ve sâir mesârif-i lâzımesi ihrâc olundukdan sonra mezbûre Râziye’nin hisse-i şer‘iyyesine sekiz bin akçe düşüp ve mehr-i müecceli dahi dört bin akçe olup hissesi ve mehri cem‘an on iki bin akçe olup muhallefât-ı mezbûreye ben vâzı‘ü’l-yed olduğum ecilden meblağ-ı merkūmu bi’t-tamâm ve’l-kemâl mezkûre Râziye’ye verip haklaşmağı ta‘ahhüd ve iltizâm eyledim dedikde vekîl-i merkūmu cemî‘ kelimât-ı meşrûhasında mesfûre Râziye vicâhen ve şifâhen tasdîk edicek mâ vaka‘a kayd olundu. Târih-i mezbûr. Şuhûd: Hasan [b.] Ahmed el-İmâm, Mustafa [b.] Nasrullah, Hüsrev [b.] Abdullah, Mustafa [b.] Ali, Mahmud [b.] Mehmed, Mustafa [b.] Mehmed, el-Hâc İbrahim, Mustafa [b.] Mehmed er-Reis ve gayruhüm