Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 227 Hüküm no: 265 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râziye Hatun’un miras payını aldığı Bundan akdem kasaba-i Kasımp[aşa’da] Surûrî Çelebi mahallesinde fevt olan Dardağanoğlu demekle ma‘rûf Mehmed Reis’in zevcesi Râziye Hâtun meclis-i şer‘-i şerîfde müteveffâ-yı mezbûrun kız karındaşı ve vârisesi fahrü’l-muhadderât Selimşah Hâtun tarafından bimâ hüve nehcü’s-sübût şer‘an vekâleti sâbite olan tersâne-i âmire çavuşlarından Hüseyin Reis b. Ali mahzarında bi’t-tav‘ ve’r-rızâ ikrâr ve takrîr-i merâm edip müteveffâ-yı mezbûrun muhallefâtından dört bin akçe mehr-i müeccelimi ve kassâm defteri mûcebince bana düşen sekiz bin akçe hisse-i şer‘iyyemi vekîl-i mezbûrun yedinden bi’t-tamâm ve’l-kemâl alıp kabz eyledim mehrimden ve hissemden muhallefât-ı mezbûrede bir akçe ve bir habbe hakkım kalmadı min ba‘d husûseyn-i mezbûreyne müte‘allik taleb ve da‘vâm yoktur eğer taleb ve da‘vâ edersem lede’l-hükkâm istimâ‘ olunmaya dedikde mukırra-i mezbûreyi ikrâr-ı meşrûhunda vekîl-i mezbûr vicâhen tasdîk ve şifâhen tahkīk edicek mâ hüve’l-vâki‘ vukū‘u üzre gıbbe’t-taleb kayd ve ketb olundu. Cerâ zâlike ve hurrire fî evâili Recebi’l-mürecceb sene sitte ve elf. Şuhûd: Mevlânâ Hasan Ahmed el-İmâm, Hüseyin b. Yusuf, el-Hâc Memi b. Süleyman, Mustafa el-Muhzır, Hüsrev [b.] Abdullah, Hasan kâtib ve gayruhüm