Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 230 Hüküm no: 272 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed’in miras ihtilâfında Osman Bey ile sulh olduğu Oldur ki Mahmiye-i Kostantıniyye mahallâtından Seydi Halîfe mahallesi sâkinlerinden olup bundan akdem vefât eden merhûme Hûri bt. Abdullah nâm hâtunun li eb ve üm karındaşı oğlu Mehmed nâm bâliğ meclis-i şer‘de işbu hâfızü’l-kitâb müteveffât-ı mezbûrenin zevc-i metrûkü olan Osman Bey b. Hacı nâm Cündî muvâcehesinde takrîr-i kelâm ve ta‘bîr ani’l-merâm edip müteveffât-ı merkūmenin muhallefâtı husûsunda zevc-i merkūm Osman Bey ile mâbeynimizde münâza‘ât-ı kesîre ve muhâsamât-ı şedîde vâki‘ olmuşdu el-hâletü hâzihî mastûr Osman Bey’e yine mahmiye-i mezbûrede vâki‘ Davud Paşa iskelesi kurbunda inde’l-ahâlî ve’l-cîrân ma‘lûmetü’l-hudûd olan dört bin akçe kıymetli bir bâb bozahâne dükkânını teslîm edip ol dahi kabz ve tesellüm eyleyip ba‘de’l-yevm müteveffât-ı merkūmenin muhallefâtı husûsunda da‘vâ ve nizâ‘ım kalmadı, zimmetini ibrâ-i âm ile ibrâ ve iskāt-ı tâm ile iskāt eyledim dedikde mukırr-ı merkūmun vech-i meşrûh üzre olan kelâmın merkūm Osman Bey vicâhen tasdîk ve tahkīk ettikden sonra mâ hüve’l-vâki‘ alâ vukū‘ihî kayd olundu Tahrîren fi’l-yevmi’s-sâmin aşer min şehri Receb sene sitte ve elf. Şuhûdü’l-hâl: Hüsam Efendi b. Şaban el-Mütevellî, Murtaza b. ( ), el-Hâc Ali b. Süleyman er-Râcil, Sinan b. Ali el-Müezzin, el-Hâc Mehmed b. Ali, Ahmed b. Sinan ve gayruhüm