Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 234 Hüküm no: 280 Orijinal metin no: [42b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahri Hatun ile Kademî’nin miras hususunda Fâtıma’yı ibrâ ettikleri Hüccet-i ibrâ Kasaba-i Kasımpaşa’da vâki‘ Sirkeci mahallesi sâkinlerinden olup bundan akdem İznikmid nâm kasabada vefât eden hâssa reislerden Cafer Reis b. Abdullah nâm müteveffânın zevce-i metrûkesi olan Fahri Hâtun bt. Mahmud ve müteveffâ-yı mezbûrun sulbî oğlu Kademî nâm kimesne meclis-i şer‘-i şerîfde işbu hâmiletü’l-kitâb müteveffâ-yı mersûmun sulbiye kızı Fâtıma nâm kebîre muvâcehesinde ikrâr-ı sahîh-i şer‘î ve i‘tirâf-ı sarîh-i mer‘î kılıp mezkûre Fâtıma ile merhûm Cafer Reis’in muhallefâtı husûsunda bi vechin mine’l-vücûh ve sebebin mine’l-esbâb da‘vâ ve nizâ‘ımız kalmayıp zimmetini ibrâ-i âm ile ibrâ ve iskāt-ı tâm ile iskāt eyledik, ba‘de’l-yevm husûs-ı mezbûra müte‘allik bizden veya vekîlimizden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dediklerinde mukırrân-ı mezkûrânın vech-i meşrûh üzre sâdır olan kelâmın mesfûre Fâtıma Hâtun vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb ve terkīm olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fî evâhiri şehri Receb sene sitte ve elf. Şuhûd: Fahrü’l-müderrisîn İbrahim Efendi eş-şehîr bi Çavuşzâde, Hüseyin Çavuş b. Ali el-Kāidü’s-sultânî, Mustafa Halîfe b. Ramazan el-İmâm, Mehmed Reis b. Ahmed eş-şehîr bi Şerbetçizâde, Mustafa Çelebi b. Şaban el-İmâm, Ahmed b. Ali, Ahmed b. Mahmud, Ahmed b. Ali, Mehmed b. Yusuf el-Muhzır, Kasım b. Abdullah ve gayruhüm mine’l-hâzırîn