Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 234 Hüküm no: 281 Orijinal metin no: [42b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma’nın miras hususunda Fahri Hatun ve Kademî’yi ibrâ ettiği Hüccet-i ibrâ Kasaba-i Kasımpaşa’da vâki‘ Sirkeci mahallesi sâkinlerinden olup bundan akdem İznikmid nâm kasabada vefât eden hâssa reislerden Cafer Reis b. Abdullah nâm müteveffânın sulbiye kızı Fâtıma nâm kebîre meclis-i şer‘-i şerîf-i lâzımü’t-tevkīr[d]e işbu sâhibü’l-kitâb müteveffâ-yı mezbûrun zevce-i metrûkesi olan Fahri Hâtun bt. Mahmud ve merhûm-ı mezkûrun sulbî oğlu Kademî nâm kimesnenin muvâcehesinde ikrâr ve i‘tirâf edip mezkûre Fahri Hâtun ve merkūm Kademî ile babam merhûm Cafer Reis’in muhallefâtı husûsunda bi vechin mine’l-vücûh ve sebebin mine’l-esbâb da‘vâ ve nizâ‘ım kalmayıp zimmetlerini ibrâ-i âm ile ibrâ ve iskāt-ı tâm ile iskāt eyledim ba‘de’l-yevm husûs-ı mezbûra müte‘allik benden veya vekîlimden da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırra-i merkūmenin vech-i meşrûh üzre sâdır olan kelâmın mezbûrân Fahri Hâtun ve Kademî vicâhen tasdîk ve şifâhen tahkīk ettikden sonra sıhhat-i ibrâya ve kat‘-ı nizâ‘a hükm olunup mâ vaka‘a alâ vukū‘ihî ketb ve terkīm olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fî evâhiri şehri Receb sene sitte ve elf. Şuhûd: Es-Sâbikūn