Galata Mahkemesi 20 Numaralı Sicil (H. 1005 - 1007 / M. 1596 - 1599) cilt: 35, sayfa: 235 Hüküm no: 282 Orijinal metin no: [42b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Terekedeki evin diğer mirasçılar tarafından Fâtıma’ya hibe edildiği Hüccet-i menzil Kasaba-i Kasımpaşa’da vâki‘ Sirkeci mahallesi sâkinlerinden olup bundan akdem İznikmid nâm kasabada vefât eden hâssa reislerden Cafer Reis b. Abdullah nâm müteveffânın zevce-i metrûkesi olan Fahri Hâtun bt. Mahmud kendi tarafından asâleten ve müteveffâ-yı mezbûrun sulbiye kızı İsmi nâ[m] sagīre tarafından vesâyeten meclis-i şer‘-i şerîf-i lâzımü’t-tevkīrde işbu sâhibetü’l-kitâb merhûm-ı mezkûrun sulbiye kızı Fâtıma nâm kebîre muvâcehesinde takrîr-i kelâm ve ta‘bîr ani’l-merâm edip müteveffâ-yı mersûmun mahalle-i merkūmede vâki‘ bir tarafı el-Hâc İbrahim vakfı ve bir tarafı Râziye Hâtun bt. Mahmud mülkü ve bir tarafı tarîk-i hâs ile mahdûd olan üç beyt-i ulvî ve iki beyt-i süflî ve bi’ri mâyı ve sofayı ve kenîfi ve hadîka-i zât-ı müsmire ve gayr-ı müsmireyi müştemil olan menzili kırk bin akçe bahâya tutup mezkûre Fâtıma’nın kendi hissesine babası merhûm Cafer Reis’in muhallefâtından bi hasebi’ş-şer‘ on iki bin yüz altmış yedi akçe intikāl edip ba‘dehû müteveffâ-yı merkūm Cafer Reis’in sulbî oğlu Sâdık nâm kebîr vefât edip bi hasebi’ş-şer‘-i şerîf merhûm Sâdık’dan dahi mezbûre Fâtıma’ya beş bin altmış dokuz akçe intikāl edip cem‘an on yedi bin iki yüz otuz altı akçe mesfûre Fâtıma’nın [43a] hissesi olup bâkī kalan yirmi iki bin yedi yüz altmış dört akçeden zevcim merhûm Cafer Reis’in zimmetinde olan altı bin akçe mehr-i müeccelim ve sümün hissem dahi bi hasebi’ş-şer‘ on bin dört yüz on yedi akçe edip ve oğlum merhûm Sâdık’dan dahi südüs hissem dört bin elli beş akçe olup cem‘an yirmi bin dört yüz yetmiş iki akçe hissemi merkūme Fâtıma’ya hibe edip ol dahi kabûl ve kabz edip bâkī kalan iki bin iki yüz doksan iki akçemi mersûme Fâtıma’dan asâlet ve vesâyetim hasebiyle bi’t-tamâm ve’l-kemâl alıp kabz eyledim ba‘de’l-yevm menzil-i merkūm mesfûre Fâtıma’nın mülk-i müşterâsı olup keyfe mâ teşâ’ ve tahtâr mutasarrıfa ola dedikde mukırra-i merkūmenin kelimât-ı meşrûhasını mersûme Fâtıma bi’l-muvâcehe tasdîk ve bi’l-müşâfehe tahkīk ettikden sonra sıhhat-i bey‘a ve cevâz-ı iştirâya hükm olunup mâ hüve’l-vâki‘ alâ vukū‘ihî ketb olunup tâlibi yedine vaz‘ olundu ki vakt-i hâcetde mübeyyin-i hâl ola. Tahrîren fî evâhiri şehri Recebi’l-mürecceb sene sitte ve elf. Şuhûd: Es-Sâbikūn fi’l-varaki’s-sâbık