İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 421 Hüküm no: 512 Orijinal metin no: [216-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarraf Dimitri ve ortağı Ohan’a olan borcunu taksitle ödemeyi kabul eden Midillili Yorgi’nin hapisten çıkarılması 6257 [guruş], yüzer guruş beher sene vermek üzere ıtlâk Ma‘rûz, Mahmiye-i İslambol’da Papasoğlu Hanı’nda mütemekkin Sarrâf tâifesinden derûn-ı arzuhâlde isimleri merkūm Dimitri v. Yorgi ve şerîki Ohan v. Gavril medyûnları olup dokuz aydan beri hapis etdirdikleri Midillili arzuhâl eden Yorgi v. Dimitri nâm zimmîyi vârid olan fermân-ı âlîlerine imtisâlen meclis-i şer‘-i şerîfe ihzâr ve muvâcehesinde işbu yedimizde olup Ahiçelebi Mahkemesi nâibleri efendilerin hatemleriyle mahtûm iki kıt‘a i‘lâmlar mantûkunca merkūm Dimitri zimmetinde cihet-i karzdan altı bin iki yüz elli yedi guruş mahkûmün-bih hakkım olup hattâ yetmiş beş senesi Zilhiccesi’nin yirmi yedinci günü mahkeme-i mezbûrede bizimle lede’l-murâfa‘a ve’t-taleb ikrâr u i‘tirâf ba‘dehû işbu yetmiş dokuz senesi Saferi’nin yirmi altıncı günü yine mahkeme-i mezbûrede Midillili Abdurrahman Ağa nâm kimesneden havâle etmiş idim deyü tasaddî eylediği da‘vâsında mübtıl ve kâzib ve deyn-i merkūm cihet-i mezkûreden zimmetinde bize deyni olduğunu tekrâr ikrâr ve işhâd dahi etmiş idi deyü da‘vâ ve merkūm Yorgi dahi cevâbında deyn-i merkūm altı bin iki yüz elli yedi guruş cihet-i mezkûreden şerîkân-ı merkūmâna deyni olduğunu kezâlik ikrâr u i‘tirâf edip lâkin hâlâ ve def‘aten edâya kudretim yokdur deyü istîcâl etmeğin, merkūm sarrâflar dahi târîh-i i‘lâmdan beher sene tamâmında yüzer guruş vermek üzere deyn-i merkūmun üç bin iki yüz elli guruşunu otuz iki buçuk sene tamâmına dek rızâlarıyla taksît ve mâ‘adâ üç bin yedi guruşa müte‘allıka da‘vâdan merkūm Yorgi’nin zimmetini ibrâ ve iskāt etdiklerinde ol dahi merkūm sarrâfların ibrâlarını kabûl ve deyn-i mukassat-ı merkūm üç bin iki yüz elli guruşu müddet-i mezkûre tamâmına dek edâya ta‘ahhüd etdikden sonra merkūm Yorgi’nin ancak nefsine Mimar Çarşısı’nda Bağcı Sava v. Hıristodolo nâm zimmî kefil olup bu minvâl üzere kat‘-ı nizâ‘ eyledikleri rızâlarıyla tescîl ve merkūm Yorgi’nin hapisden ıtlâk olunmasını istid‘â eyledikleri mübâşiri İbrahim Çavuş kulları iltimâsıyla huzûr-ı âlîlerine i‘lâm olundu. Fî 29 min-Şevvâl sene 1179.