İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 420 Hüküm no: 511 Orijinal metin no: [216-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Haçok’un kızı Toruka’nın diğer varis Arakil aleyhindeki miras davasında anlaşma sağlanması Dikilitaş ve Beylik Değirmen âlâtından sulh 750 [guruş] Ma‘rûz, Eğin kazâsına tâbi‘ Mirkab nâm karye ahâlîsinden olup yetmiş üç senesinde hâlik olan Haçok v. Norsiz v. Mardıros nâm zimmînin verâseti sulbî kebîr oğlu ve hâlâ Unkapanı’nda Beylik Değirmen demekle ma‘rûf değirmende müstecir Arakil ile karye-i mezbûrede mütemekkine sulbiye kebîre kızı Toruka nâm Nasrâniyeye ale’l-inhisâr hâlik-i merkūmun torunu arzuhâl eden Hamparsum v. Artin nâm zimmî meclis-i şer‘-i hatîrde zikri âtî eşyâya vâzı‘ü’l-yed olan mesfûr Arakil muvâcehesinde işbu yedimde olan mübâya‘a hücceti mantûkunca yetmiş sekiz senesi Muharremi evâhirinde merkūm Toruka hâlik-i merkūmun terekesinden zikr olunan Mirkab karyesinde olan ma‘lûmü’l-hudûd bahçe ve bağda olan sülüs hissesi ile ve merkūm Arakil’in vaz‘-ı yed eylediği karye-i mezbûrede vâki‘ menzili derûnunda olan eşyâ-yı ma‘lûme ve Dikilitaş Değirmeni’nde mevcûd gedik ta‘bîr olunur otuz dört sehmden dokuz sehim âlât-ı lâzıme ve zikr olunan Beylik Değirmeni’nde kezâlik kırk sehim üzerine olan âlât-ı lâzımesinden sülüs hissesini bana semen-i ma‘lûme bey‘ ve kabza beni taslît ve tarafından tevkîl etmekle merkūm Arakil’den taleb ve da‘vâ eylediğimde ol dahi Dikilitaş Değirmeni için şerîklerimiz ile zarâr edip medyûn olmağla âlât-ı mezkûreden babam merkūmun hissesini tarafından vekâleten Kiragos ve Mikail ve Avanis nâm zimmîlere yetmiş senesinde bey‘ edip semeni ile edâ-yı deyn etmiş idim ve mârrü’z-zikr Beylik Değirmen’de olan âlât-ı mezkûreyi sâbıkā Matbâh Emîni Halil Efendi’den ben müstakillen iştirâ ve kırk seneden mütecâviz kendi mülküm olmak üzere tasarruf ederim deyü beynlerinde ba‘de-vukū‘i’l-münâza‘a müdde‘î-i merkūm Hamparsum bâ-vesâtet-i Müslimîn merkūm Arakil ile da‘vâ-i mezkûresinden yediyüz elli guruş üzerine sulh olup gerek Dikilitaş ve Beylik Değirmenlerde olan âlât-ı mezkûreye ve ücretine ve gerek menzil-i mezkûrda olan cemî‘ eşyâya müte‘allıka âmme-i da‘vâ ve kâffe-i mutâlebâtdan merkūm Arakil’in zimmetini ibrâ-i âm ile ibrâ ve iskāt eyledikde ol dahi ibrâsını kabûl ve kat‘-ı nizâ‘ eyledikleri rızâlarıyla tescîl olunup bi’l-iltimâs huzûr-ı âlîlerine i‘lâm olundu. Fî 28 min-Şevvâl sene 1179.