İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 419 Hüküm no: 510 Orijinal metin no: [215-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serdengeçti emeklilerinden Ali b. Ahmed’in Rabia bt. Ali aleyhindeki menzil davasında anlaşma sağlanması Balat kurbünde 3 bâb menzil Bürüncükcü bodrumu, 1 mahzen sulh, zincirli altın 50 [aded] Ma‘rûz, Vârid olan fermân-ı âlîye imtisâlen dâ‘îhânede Haremeyn-i muhteremeyn Müfettişi müderrisîn-i kirâmdan Ahmed Necib Efendi dâ‘îleriyle akdolunan meclis-i şer‘-i hatîrde derûn-ı arzuhâlde mezkûr serdengeçti mütekā‘idlerinden Ali b. Ahmed Haremeyn-i muhteremeyn Vakfı’ndan Balat kurbünde Gönânî mahâllesinde vâki‘ etrâf-ı erba‘ası imam meşrûtası bahçe ve Eyüb Ağa veresesi bahçesi ve İbrahim Ağa menzili ve tarîk-i âm ile mahdûd üç bâb menzil ve tahtında Bürüncükçü bodrumu ve ittisâlinde vâki‘ bir bâb mahzen ferâğ-ı kat‘î ve mütevellî temessüküyle arzuhâl eden Rabia’nın babası Fodula Kâtibi Ali Efendi b. Mehmed’in üzerinde iken fevt oldukda âdiyen kızı mezbûre Rabia’ya intikāl etmekle mezbûre Rabia tarafından vekîl-i şer‘îsi Osman b. Murad mahzarında mütevellî-i vakıf Abdullah Efendi tarafından vekîl olan Kapıcı Ali hâzır olduğu hâlde zikr olunan menzil ile müştemilât-ı mezkûresi Mehmed b. Ahmed nâm kimesne üzerinde iken bin yetmiş üç senesi Saferi’nin yirmi ikinci günü târîhinde ben tefevvüz edip ol târîhde bedeli için mezbûre Rabia’nın babası müteveffâ-yı mezbûr Kâtib Ali Efendi’den karz olmak üzere altı yüz guruş alıp ve mukābelesinde ferâğ bi’l-vefâ tarîkiyle mezbûr Ali Efendi’ye ferâğ edip kable ahzi’d-deyn mezbûr Ali Efendi fevt olup ve menzil-i mezkûr kızı mezbûreye intikāl etmekle hâlâ edâ-yı deyn ve fekk-i ferâğ olunmak matlûbumdur deyü da‘vâya tasaddî vekîl-i mezbûr dahi cevâbında işbu yedimde olup yetmiş üç senesi şehr-i Rebî‘ülâhiri’nin on dördüncü günü târîhiyle müverraha hüccet mantûkunca ol târîhde mahmiye-i İstanbul’da Bâb nâibi olan Ömer Efendi b. Abdülkerim huzûrunda müdde‘î-i mezbûr zikr olunan menâzil ve müştemilâtı ile İslambol kādılar efendiler nezâretlerinde olan evkāfdan Bıçakçı Alaeddin ve Kethüdâ Pîrî vakıflarında arsalarını bedel-i ma‘lûm mukābelesinde vefâen fâriğ olmuş idim deyü mezbûr Ali Efendi’den da‘vâ, ol dahi cevâbında üç bin guruş bedel-i makbûz mukābelesinde bana ferâğ-ı kat‘î ile ferâğ olmuş idin dedikde ol dahi ferâğ-ı mezkûrun kat‘î olduğunu ikrâr u i‘tirâf eylediğinden mâ‘adâ zikr olunan arsa ve menzilere müte‘allıka âmme-i da‘vâdan zimmetini ibrâ etmiş idi deyü def‘ eyledikde müdde‘î-i mezbûr zikr olunan arsalar için vech-i meşrûh üzere kat‘î olduğunu ikrâr ve ibrâ eylediğini mu‘terif olup lâkin zikr olunan menâzilden ikrâr ve ibrâsını inkâr, vekîl-i mezbûr dahi isbât esnâsında bâ-vesâtet-i Müslimîn vekîl-i mezbûr müvekkilesi tarafından müdde‘î-i mezbûr Ali’ye bi-tarîkı’s-sulh elli zincirli altın verip ve da‘vâsından zimmetini bi’l-vekâle ibrâ etdikde ol dahi zikr olunan elli altını ahz u kabz edip zikr olunan menâzil-i mahdûdeye ve müştemilâtına müte‘allıka âmme-i de‘âvî ve kâffe-i mutâlebâtdan müvekkile-i mezbûre Rabia Hatun’un zimmetini ibrâ-i küllî ile ibrâ ve iskāt etdikde vekîl-i mezbûr dahi ibrâsını kabûl ve bu minvâl üzere kat‘-ı münâza‘a eyledikleri mübâşir ( ) iltimâsıyla huzûr-ı âlîlerine i‘lâm [olundu]. Fî 29 min-Şevvâl sene 1179.