İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 419 Hüküm no: 509 Orijinal metin no: [215-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşi öldükten sonra evine kadın getiren Koltukçu Ahmed’in mahalleden ihraç olunması Koltukçu Ahmed’i mahâlleden ihrâc Ma‘rûz, Mahmiye-i İslambol’da Kırkçeşme’de Hüsam Bey mahâllesinden arzuhâl eden İmam Mehmed Efendi ve Müezzin el-Hâc Mustafa ve ahâlîsinden Bezistânî el-Hâc Mehmed ve Cezâyirli el-Hâc Mustafa ve diğer el-Hâc Mustafa ve es-Seyyid Yusuf ve Hâfız Süleyman Efendi ve Kahveci Mahmud ve Aşçı el-Hâc Mustafa ve Yağcı Musa ve Canbaz es-Seyyid Ali ve Çukadâr Salih ve Yorgancı Ömer meclis-i şer‘-i şerîfe ihzâr eyledikleri mahâlle-i mezbûrede sâkin ve arzuhâllerinde mezkûr Koltukçu Ahmed için kendi hâlinde olmayıp bundan akdem zevcesi fevt olmağla menziline nâ-mahrem avradlar getirip ahz olundukda itâle-i lisân ve şetm edip bir vechile mütenebbih olmamağla mezbûr Ahmed’in hilâf-ı şer‘-i şerîf hareket ve lisânından emniyetimiz yokdur deyü muvâcehesinde sû-i hâlini inhâ ve mahâlle-i mezbûreden ta‘zîren ihrâcı bâbında emr-i âlî sudûrunu istid‘â eyledikleri iltimâslarıyla huzûr-ı âlîlerine i‘lâm olundu. Fî 28 min-Şevvâl sene 1179.