İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 423 Hüküm no: 514 Orijinal metin no: [217-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüsam Bey mahallesinde kiracı olan Hasan ve eşi Hatice’nin mahalleden çıkarılmaları Mahalleden ihrâç Ma‘rûz, Mahmiye-i İslambol’da Kırkçeşme kurbünde Hüsam Bey mahâllesi İmamı Mehmed Efendi ve Müezzin el-Hâc Mustafa ve ahâlîsinden Bezistânî el-Hâc Mehmed ve Cezâyirli el-Hâc Mustafa ve diğer el-Hâc Mustafa ve es-Seyyid Yusuf ve Hâfız Süleyman Efendi ve Kahveci Mahmud ve Aşçı el-Hâc Mustafa ve Bağcı Musa ve Canbaz es-Seyyid Ali ve Çukadâr Salih ve Yorgancı Ömer meclis-i şer‘-i hatîrde mahâlle-i mezbûrede müsteciren sâkin Hasan nâm kimesne mahzarında mezbûr Hasan ve zevcesi Hadîce kendi hâllerinde olmayıp mezbûre Hadîce menziline nâ-mahrem kimesneler almağla işbu yedimizde olan i‘lâm mantûkunca mezbûre Hadîce’nin sû-i hâlini meclis-i şer‘e inhâ ve i‘lâm ve mûcebince mahâlleden ihrâc olunması bâbında fermân-ı âlî sâdır olmağla zevcân-ı mezbûrân dahi mahâllemizden çıkıp mahâlle-i uhrâya nakil etmişler idi. Hâlâ bir takrîble yine mahâllemizde müstecir oldukları menzile nakil ve ef‘âl-i sâbıkālarını icrâya mübâderet etmeleriyle kemâ-fi’l-evvel ihrâc olunmalarını istid‘â ederiz deyü teşekkî etdiklerinde mezbûr Hasan dahi rızâsıyla zevcesi mezbûreyi alıp âhar mahâlle nakle ta‘ahhüd eylediği iltimâsıyla huzûr-ı âlîlerine i‘lâm olundu. Fî 29 min-Şevvâl sene 1179.