İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 424 Hüküm no: 515 Orijinal metin no: [217-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa tüccarından Ansi v. Ansi’ye olan borcunu ödemesi hususunda Çukacı Kedalya’ya tenbihte bulunulması Çukacı Kedalya Yahûdî 2200 [guruş] edâya ilzâm Ma‘rûz, Galata’da mütemekkin Françe bazergânlarından Ansi v. Ansi Mustafa Çavuş kulları ma‘rifetiyle ahz ve İstanbul mahkemesine ihzâr etdirdiği çukacılar içinde Tâcirler sokağı’nda Çukacı Kedalya v. Yako nâm Yahûdî muvâcehesinde merkūm Kedalya bundan akdem yedimden iştirâ ve kabz eylediği zirâ‘ ve fîsi beynimizde ma‘lûm çuka semeninden işbu yedimde olan üç kıt‘a temessükü mantûkunca zimmetinde olan iki bin iki yüz guruş hakkımı hâlâ merkūm Kedalya’dan taleb ederim deyü ba‘de’d-da‘vâ ve’l-istintâk merkūm Kedalya Yahûdî cevâbında zikr olunan temessükler mantûkunca iki bin iki yüz guruş cihet-i mezkûreden zimmetinde müdde‘î-i mesfûr Ansi’ye deyni olduğunu ikrâr u i‘tirâf etmeğin ikrârı mûcebince deyn-i merkūm iki bin iki yüz guruşun edâsıyla merkūm Kedalya ilzâm olunduğu mübâşiri mezbûr iltimâsıyla huzûr-ı âlîlerine i‘lâm olundu. Fî-selhi min-Şevvâl sene 1179.