İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 425 Hüküm no: 517 Orijinal metin no: [218-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Bey Vakfı’ndan Fatıma Hatun ve Saliha Hatun’un tasarrufunda olan menzilin ifraz ve taksime uygun olmadığı Keşf der-kurb-ı Ayasofya-i kebîr Ma‘rûz, Vârid olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz es-Seyyid Halil Efendi dâ‘îleri ve Hâssa mi‘mârlarından Osman ve Ebubekir Halîfeler ve sâir ümenâ-yı şer‘le mahmiye-i İslambol’da Ayasofya-i kebîr kurbünde Üskübî mahâllesinde vâki‘ Yusuf Bey Vakfı’ndan zikri âtî menzile varıp akdeylediği meclis-i şer‘-i şerîfde mütevellî-i vakıf Mehmed Efendi b. Mehmed hâzır olduğu hâlde sâhibe-i arzuhâl Fâtıma Hatun bt. Mehmed Efendi b. Abdurrahman tarafından husûs-ı âti’l-beyanda vekîl olduğu zâtını ârifân Mehmed Efendi b. Ali ve İbrahim Bey b. Hüseyin şehâdetleriyle sâbit İsmail Ağa b. Mehmed arzuhâlde mezkûre ve zâtı Osman Efendi b. Mehmed ve el-Hâc Mustafa b. Osman ta‘rîfleriyle mu‘arrefe Saliha Hatun bt. Abdullah mahzarında işbu derûnunda akd-i meclis-i şer‘-i şerîf olunan menzil-i mezkûrun ber-mûceb-i temessük nısf-ı şâyi‘i müvekkilem mezbûre Fâtıma Hatun’un ve nısf-ı şâyi‘-i âharı dahi mezbûre Saliha Hatun’un olmağla ifrâz ve ta‘yîn olunmak bi’l-vekâle matlûbumdur dedikde mi‘mârân-ı mezbûrân takvîm ve tahmîn ve misâha eyleyip kābil-i taksîm olmadığını ihbâr etmeleriyle işbu bin yüzyetmiş dokuz senesi Zilka‘deti’ş-şerîfesi’nin onuncu gününden bir sene tamâmına değin mezbûre Saliha Hatun bt. Abdullah rızâsıyla menzil-i merkūmu mezbûre Fâtıma’ya teslîm ve hisse-i şâyi‘asını ayda yedişer guruşa icâra ta‘ahhüd eyleyip ve bu vechile kat‘-ı nizâ‘ eylediklerini mezbûr dâ‘îleri mahâllinde tahrîr ve gelip ümenâ-yı şer‘le inhâ eyledikleri bi’l-iltimâs huzûr-ı âlîlerine i‘lâm olundu. El-emrü li-veliyyi’l-emr. Beyaz sah, Nüsha-i sâniye verilmişdir.