İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 426 Hüküm no: 518 Orijinal metin no: [219-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görevini kötüye kullanan Kasaplar Orta Kâtibi Abdülkadir’in azil ve fenalıkta ısrar ederse Bozcaada’ya sürgün edilmesi Kasablar Kâtibi es-Seyyid Abdülkadir esnâf umûruna ta‘arruz etmeye Ma‘rûz, Hâlâ Kasabbaşı Ali Ağa kullarının takrîri bâlâsına izzetlü Yeniçeri Ağası ma‘rifetiyle hakīkat-i hâlini suâl ve iktizâsını i‘lâm eyleyesin deyü bu dâ‘îlerine hitâben vârid olan fermân-ı âlîye imtisâlen izzetlü Yeniçeri Ağası tarafından ta‘yîn olan Ocak Yazıcısı Osman Efendi kulları ma‘rifetiyle meclis-i şer‘-i şerîfe hâzirûn olan hâlâ Kasablar Kethüdâsı Mehmed ve sâbıkā Kethüdâ el-Hâc Mehmed ve kasab ihtiyârlarından el-Hâc Mehmed ve diğer el-Hâc Mehmed ve Osman Efendi ve el-Hâc Abdi ve es-Seyyid İbrahim ve Yedikule Yiğitbaşısı el-Hâc Abdullah ve Osman ve Tophaneli es-Seyyid Yakub ve Kasımpaşalı el-Hâc Ömer ve İsmail ve Diridli Mehmed ve Üsküdarlı el-Hâc İsmail ve Ali ve Estorozlu diğer Ali ile celeb tâifesinden Hasköylü İsmail ve zimmî celeblerden Galatalı Lefter ve Beşiktaşlı Hanna ve Tarandafil ve Vasil ve Ziro ve Niko ve Panayot ve Yorgi ve Yani ve Dimitri ve Soto ve İstefan ve Dilko nâm zimmîler mezbûr Ali Ağa hâzır olduğu hâlde takrîr-i mezkûrda münderic babasından müntakil bilâ-ta‘yîn beratla esnâf-ı mezkûrenin orta kâtibi ta‘bîr etdikleri ihtifâ edip ihzârı mümkün olmayan gāib ani’l-meclis es-Seyyid Abdülkadir b. Hüseyin için kendi hâlinde olmayıp hizmet-i memûresinde hıyânet ve celeb tâifesinin koyunlarını tevzî‘ ve yâfta tahrîrinden noksân tahrîr etmekle her sürüden sekizer ve dokuzar koyunu kendi için ifrâz ve çaşni zamânlarında hesâbda gâh zam ve gâh noksân ile hesâb edip tarafeyne gadr ve alâkası olmadığı kimesnelerin gediklerine ta‘arruz ve üzerlerinden kaldırıp ve ba‘zılarının dahi akçelerini alıp hilâf-ı mu‘tâd bilâ-kefil gediklere vaz‘ ve münâdiye ile tevzî‘a tertîb olunan celeblerin sürülerini akçelerini celb kasdıyla bilâ-te’hîr tevzî‘a sürüp bu misillü hîle ve ızrâr âdet-i müstemirresi olmağla bundan akdem bir def‘a dahi mezbûrûn teşekkî esnâsında firâr ve iki sene mikdârı ihtifâ etmekle her vechile mezbûr Abdülkadir’den emniyetimiz meslûb olup bir dahi zuhûra gelip kâtib olursa cümlemizin perîşân olmasına bâdî olacak bir hîlekâr kimesnedir deyü sû-i hâlini ihbâr ve fî-mâ-ba‘d ma‘rifet-i şer‘-i şerîf ve kasabbaşı ağası ma‘rifeti ve kethüdâ ve ihtiyâr ustaları ma‘rifetleriyle yerine cümlemizin emîn olduğu bir müstakīm ve sadâkat-güzâr kimesne mezbûr ref‘inden kâtib ta‘yîn buyrulup medâr-ı ma‘âş olup rızkı kat‘ olunmamak için avâidinden mezbûra senevî iki yüz elli guruş vermek şartıyla tevcîh ve mezbûr Abdülkadir’in yedinde olan defterler ba‘de’l-ahz zuhûr edip yine esnâfımız umûruna ve kitâbet-i mezkûreye ta‘arruz eder ise Bozcaada’ya nefy ile te’dîb olunmak bâbında fermân-ı âlîleri sudûruyla nizâm-ı kavîye rabt buyrulmasını istid‘â ederler. Fermân hazret-i veliyyü’l-emrindir. Fî-gurreti Zilka‘de sene 1179.