İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 427 Hüküm no: 519 Orijinal metin no: [219-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukıye Hatun’un, Sabiha Hatun aleyhindeki menzil ve arsa davasından vazgeçmesi Keşf der-kurb-ı hazret-i Eyüb Ma‘rûz, Sâdır olan fermân-ı âlîlerine imtisâlen savb-ı şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri ve evkāf müfettişi fazîletlü Ali Efendi dâ‘îleri tarafından mürsel es-Seyyid İbrahim Arif Efendi dâ‘îleri ve Hâssa mi‘mârlarından es-Seyyid İbrahim ve Osman ve Mustafa halîfeler ve sâir ümenâ-yı şer‘le medîne-i Ebâ Eyyûb Ensârî -aleyhi rıdvânü’l-bârî’de- vâki‘ nezâret-i hazret-i Sadr-ı a‘zamî’de âsûde olan evkāfdan Mukābele Süvârî-i esbak el-Hâc Osman Efendi Vakfı’ndan sâhibe-i arzuhâl Rukıye Hatun bt. Abdurrahman tasarrufunda olan menzile varıp huzûr-ı Müslimînde akd-i meclis-i şer‘-i şerîf etdiklerinde mütevellî-i vakıf Mehmed Emin efendi hâzır olduğu hâlde mezbûre Rukıye Hatun’un vekîl-i müsecceli zevci İsmail Çelebi b. Ahmed meclis-i ma‘kūd-ı mezkûrda nezâret-i dâ‘îlerinde olan evkāfdan Mesihpaşa-i atik Vakfı’ndan mârrü’z-zikr menzil ittisâlinde vâki‘ bir bâb menzile mutasarrıfe olan arzuhâlde mezkûre Sabiha Hatun bt. Mustafa ile mütevellî-i vakf-ı mezkûr tarafından câbî-i vakıf Abdullah Efendi b. Mehmed ile terâfu‘larında işbu mu‘âyene olunan menzilim ittisâlinde sundurma binâsıyla hevâ ve nezâretimiz men‘ ve kat‘ ve menzilin sel suyu akageldiği mecrâyı sedd ü bendimizde müşterek olan su kuyusu ittisâline müvekkilem tarafında vâki‘ arsayı gasb [220] ve üzerine duvar binâ ve zikr olunan müşterek kuyuyu dahi isti‘mâlden beni men‘ eyledi deyü tasaddî eylediği da‘vâsından meccânen fâriğ olup zikr olunan husûslara müte‘allıka da‘vâdan mezbûre Sabiha’nın bi’l-vekâle zimmetini ibrâ ve iskāt etdikde ol dahi ibrâsını kabûl ve kat‘-ı nizâ‘ eylediklerini mezbûrân dâ‘îleri mahâllinde tahrîr ve gelip ümenâ ile inhâ eyledikleri bi’l-iltimâs huzûr-ı âlîlerine i‘lâm olundu. Fî 24 min-Şevvâl sene 1179.