İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 436 Hüküm no: 532 Orijinal metin no: [225-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tekirdağı İskelesi’nde yanmış olan Yahudihane ve mahzenler hakkında keşif ve tahkikat yapılması Bâ-sah, İstanbul kādısı efendi ve Haremeyn müfettişi efendi ve evkāf müfettişleri efendiler ve Hâssa mi‘mâr ağa yedlerinde olan senedâtlarına nazar ve vukū‘u üzere i‘lâm eyleyesin deyü [buyruldu] Kapan hâricinde muhterik olan Yahûdîhâneler ve tahtında mahzenler Ma‘rûz, Kapan-ı dakīk tüccârı imzâsıyla mübârek rikâb-ı müstetâba verilen arzuhâl hâmişinde sâdır olan fermân-ı âlîlerine imtisâlen kapan-ı mezbûr hâricinde Tekfurdağı İskelesi’nde vâki‘ bundan akdem muhterik olan Yahûdîhâne ve tahtında olan mahzenlerin haremeyn-i muhteremeyn Müfettişi müderrisîn-i kirâmdan Ahmed Necib Efendi dâ‘îleri tarafından mürsel Mehmed Samih Efendi ve devletlü inâyetlü Sadr-ı a‘zam hazretleri nezâret-i aliyyelerinde olan evkāf müfettişi müderrisîn-i kirâmdan Ali Efendi dâ‘îleri ve semâhatlü inâyetlü veliyyü’n-ni‘am Şeyhülislâm-ı --sellemehü’s-selâm- hazretleri nezâret-i aliyyelerinde olan evkāf müfettişi mevâlî-i izâmdan fazîletlü Muradzâde es-Seyyid ahmed Efendi ile dâ‘îhâneye zikr olunan Yahûdîhâne ve mahzenlerden ancak Attâr Ömer ve Saraylı Hatun ve Meryem Nasrâniye üzerlerinde olan Haremeyn Evkāfı’ndan üç bâb Yahûdîhânenin temessükleri müstecirleri olan mezbûrûnun mahâlleri haber alınmayıp târîh-i i‘lâma dek ihzârları mümkün olmamağla ba‘de’l-ihzâr rü’yete tevkīf olunup mâ‘adâ Yahûdîhâne ve mahzenlerin mütevellîleri ve müstecirleri ihzâr ve Haremeyn nezâretinde olan dokuz bâb ve Sadr-ı a‘zam hazretleri nezâretlerinde olan evkāfdan üç bâb ve veliyyü’n-ni‘am hazretleri nezâretlerinde olan evkāfdan iki bâb ve İslambol kādıları nezâretinde olan evkāfdan iki bâb ki cem‘an on beş bâb Yahûdîhânenin tahtında yirmi altı kıt‘a mahzen temessükâtlarında muharrer olup lâkin müstecirûn-ı mezbûrûnun müdde‘îleri olan mezkûr mahzenlerde sâkin kirâcıları hâzirûn olmamağla mûmâ-ileyhim müfettiş efendiler dâ‘îleri ve taraf-ı dâ‘îlerinden dahi mürsel müderrisîn-i kirâmdan es-Seyyid Halil Efendi ve mi‘mâr ağa tarafından Mehmed Emin Halîfe ihtiyâten mahâll-i mezkûre varıp zikr olunan Yahûdîhâne ve mahzen ve dükkânların mahâllerini ba‘de’l-mu‘âyene kable’l-harîk ber-vech-i muharrer mevcûd iken muhterik olup ve ke’l-evvel binâ olunduğu sûretde kimesneye zarârı yokdur deyü mehâzîn-i merkūme müstecirlerinden hâzır olmayan iki nefer kirâcılarından mâ‘adâ kırk neferden mütecâviz mazbûtü’l-esâmi kimesneler ihbâr ve zarârı olduğunu haber verir kimesne bulunmayıp ve arzuhâl veren kim olduğu dahi ma‘lûmumuz değildir ve arzuhâlden dahi haberimiz yokdur deyü gerek merkūm kirâcılardan ve gerek ol mahâlde olan sâir Müslimîn takrîr eylediklerini mahâllinde ketb ü tahrîr ve gelip inhâ etmeleriyle bâlâda tahrîr olunup görülmeyen üç kıt‘a temessük ashâbı dahi ihzâr ve rü’yet olundukda mecmû‘u atik ve cedîd târîhleri tasrîhiyle mufassalan defteri huzûr-ı âlîlerine tekrâr arz olundu. Ma‘lûm buyruldukda emr ü fermân hazret-i men-lehü’l-emrindir. Fî 18 Şevvâl sene 1179.