İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 443 Hüküm no: 544 Orijinal metin no: [229-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaymakçılar Kethüdası Vekili Mehmed ve yiğitbaşıları Hüseyin’in hapisten çıkarılmaları Kaymakçılar kethüdâsı vekîli Mehmed ve Yiğitbaşıları Hüseyin esnâf umûruna müdâhale etmemek üzere ıtlâk Sah, İ‘lâmı mûcebince mezkûrân Mehmed [ve] Hüseyin Beşe fî-mâ-ba‘d esnâfı umûrlarına müdâhale etmemek üzere ta‘ahhüd etmeleriyle merhameten afv ü ıtlâk olunup hilâf-ı ta‘ahhüd hareketden mübâ‘adet eyleyeler deyü [buyruldu]. Fî 26 B sene [1]179. Kaymakçılar kethüdâsı vekîli Mehmed’den ve yiğitbaşıları Hüseyin Beşe nâm kimesneden yine esnâflarından Arnavud Hüseyin nâm kimesneyi kaymağı narh-ı rûzî üzere satdığım için nizâm-ı ittifâkımıza halel verirsin bahânesiyle on gündür Ağakapısı’nda habsetdirdiler deyü Çarşamba günü dîvân-ı âlîlerinde teşekkî ve merkūm Mehmed’den benim bi-gayrı hakkın dört yüz guruşumu aldı deyü da‘vâ edip merkūm Mehmed ve Yiğitbaşı Hüseyin’in bundan akdem sû-i hâli ve narha adem-i itâ‘atları ihbâr olunmağla te’dîben habsolunmuş idi. Şimdi merkūm Arnavud Hüseyin ile beynlerine muslihûn tavassut edip mezbûr Mehmed ile yüz guruşa sulh ve birbirlerinin zimmetlerini ibrâ etdiklerinden mâ‘adâ ba‘de’l-yevm esnâfı umûrlarına müdâhale etmemek üzere merkūm Mehmed ve Hüseyin Beşe ta‘ahhüd etmeleri ile afv ü ıtlâklarını istid‘â eyledikleri huzûr-ı âlîlerine i‘lâm olundu. Bâkī fermân hazret-i veliyyü’l-emrindir. Fî 25 Receb sene [1]179.