İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 461 Hüküm no: 570 Orijinal metin no: [239-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boğazkesen’deki çörekçi fırının gedik sahibleri İbrahim ile İsmail’in fırını nöbetleşe kullanmaları Tophane’de vâki‘ çörekçi fırını Ma‘rûz, Tophanede Karabaş Vakfı’ndan olup Boğazkesen nâm mahâlde vâki‘ ma‘lûmü’l-hudûd çörekçi fırınının gedik ta‘bîr olunur âlâtının nısf-ı şâyi‘ine mutasarrıf olan sâhib-i arzuhâl İbrahim mahmiye-i İstanbul’da meclis-i şer‘-i hatîrde nısf-ı âharına mutasarrıf olan derûn-ı arzuhâlde mezkûrü’l-ism el-Hâc İsmail ile terâfu‘larında fırın-ı mezkûrda olan nısf-ı şâyi‘imizin icâresi için birbirimize beher sene yüz otuz guruş verip fırın-ı mezkûrda âlât-ı mezkûreyi müstakillen bir sene tamâmına dek isti‘mâl etmek üzere beynimizde mukāvele ve ittifâk ve beynimizde bu minvâl üzere nizâm vermemiz ile bir seneden beri fırın-ı mezkûrda sâkin ve gāyet-i senemiz işbu Şa‘bân-ı şerîf gurresinde tamâm ve yirmi gün dahi mürûr etmekle şimdi ben kavlimiz üzere yüz otuz guruşu mezbûra verip ve fırın-ı mezkûrda bir sene tamâmına dek müstakillen çörekçilik edip ve bir sene mürûrunda ol dahi bana kezâlik teslîm etmek kavliyle çörekçilik etmek istediğimde ol dahi bu kavil üzere râzı olup fırın-ı mezkûru tahliye ve bana teslîme ta‘ahhüd eyledi dediğini mezbûr el-Hâc İsmail tasdîk eylediği mübâşiri iltimâsıyla huzûr-ı âlîlerine i‘lâm olundu. El-emrü li-men-lehü’l-emr. Fî 20 Şa‘bân sene 1179.