İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 463 Hüküm no: 575 Orijinal metin no: [241-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ali’nin kiracısı olduğu manav dükkânı ve gediğini Halil b. Mehmed’in varislerine teslim etmesi Âlât-ı dükkân-ı manav Mahmiye-i İstanbul’da Eminönü’nde Kahve gümrüğü altında köşede vâki‘ Mehmed Ağa Câmi‘-i şerîfi vakfından olup sadr-ı esbak Abdullah Paşazâde Said Bey tasarrufunda olan dükkânda müşâhereten müstecir olan el-Hâc Osman b. Ali meclis-i şer‘-i şerîf-i enverde dükkân-ı merkūmda mukaddemâ kezâlik müstecir iken fevt olan el-Hâc Halil b. Mehmed’in verese-i münhasırası olan işbu bâ‘isetü vesîka zevce-i menkûhası Ümmügülsüm bt. Hasan ile sulbiye kebîre kızları Rukıye ve Hafîfe [Afife] ve Hadîce taraflarından vech-i âtî <> üzere tasdîka vekîlleri olduğu zâtları ârifân Osman b. Mustafa ve Hasan b. Osman nâm kimesneler şehâdetleriyle sâbit olan el-Hâc Mustafa b. Hasan mahzarında ikrâr ve takrîr-i kelâm edip dükkân-ı merkūmda manav gediği ta‘bîr olunur terazi ve kantar ve kûfe ve tabla müteveffâ-yı mezbûr el-Hâc Halil’in mülkü ve ba‘de-vefâtihî yirmi dört sehim i‘tibârıyla üç sehmi zevce-i müvekkile-i mezbûreye ve yedişer sehmden yirmi bir sehmi farzan ve redden kızları mezbûrâtlara isâbet ve intikāl etmekle mezbûrât eşyâ-yı mezkûreyi bana âriyeten teslîm ve yanıma mezbûre Rukıye oğlu işbu hâzır bi’l-meclis Halil hâl-i suğrunda teşrîk tarîkiyle koyup ben dahi dükkânı-ı merkūmu mutasarrıf-ı mezbûrdan isticâr ve âlât-ı mezkûreye isti‘mâl esnâsında mezbûr Halil bâliğ oldukda malından sermâye çıkarıp dükkân-ı merkūmda ticâret etmekle ben dahi i‘ânet etmiş idim. Hâlâ müvekkilât-ı mezbûrât dükkân-ı merkūmda işbu mezbûr Halil tarafından müstakillen ticâret etmek üzere irâde etmeleriyle ben dahi rızâm ile dükkân-ı merkūmdan fesh-i icâre birle çıkıp ve âlât-ı mezkûreyi mezbûrâtın izniyle mezbûr Halil’e teslîm gerek âlât-ı mezkûrede ve gerek sermâyesinde benim aslâ alâka ve medhalim yokdur dediğini vekîl-i merkūm ba‘de’t-tasdîk mezbûr Halil dahi mukırr-ı mezbûru dükkân-ı merkūmun karşısında olan sergi ta‘bîr olunur mahâlde bey‘ ü şirâsına aslâ dahl ü ta‘arruz etmeyip ve icâre-i ma‘lûmesini dahi beher şehr malından mürüvveten vermeğe ta‘ahhüd etdikde mezbûr el-Hâc Osman dahi bu minvâl üzere râzı olmağın mâ-vaka‘a bi’t-taleb ketb olundu. Fî 24 min-Şa‘bân sene [1]179. Şuhûdü’l-hâl: İsmail Yazıcı, Osman Beşe, Ahmed Yazıcı, Ali Beşe, Kara Mustafa, Ali Beşe, Hüseyin Yazıcı, el-Hâc Mehmed, es-Seyyid el-Hâc Ahmed, Mustafa, Ali Yazıcı.