İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 464 Hüküm no: 576 Orijinal metin no: [241-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü esnafının eski kethüdaları Süleyman’ın esnaflıktan çıkarılması Sâbık kömürcü kethüdâsından şikâyet olunduğundan rızâsıyla san‘atından ihrâc Ma‘rûz, Mahmiye-i İstanbul’da kömürcü esnâfından arzuhâl eden kethüdâları Mehmed ve yiğitbaşıları el-Hâc osman ve el-Hâc Süleyman ve el-Hâc Halil ve es-Seyyid Osman ve el-Hâc Mehmed ve Abbas ve Hüseyin ve Hasan ve Ahmed ve Ali ve diğer Osman ve diğer Mehmed ve diğer Süleyman meclis-i şer‘-i şerîfe ihzâr etdirdikleri arzuhâlde mezkûr bundan akdem kethüdâları olan Süleyman b. Hasan’dan kendi hâlinde olmayıp kethüdâmız olduğu esnâda bizi beşbin guruş mutazarrır eylediğinden mâ‘adâ nizâmımıza mugāyir hareket ve yine kethüdâlığı almak murâd ve hîleye sülûk edip kendiden emniyetimiz meslûb olmağla san‘atımızda istemeyiz deyü teşekkî eylediklerinde ol dahi rızâsıyla san‘at-ı mezkûreden çıkıp mezbûrûnu te’mîne ta‘ahhüd eylediği mübâşiri kapıkethüdâsı iltimâsıyla huzûr-ı âlîlerine i‘lâm olundu. Fî 24 min-Şa‘bân sene 1179.