İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 465 Hüküm no: 578 Orijinal metin no: [242-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlı Paşa Sarayı’ndaki boyacı ve basmacı esnafının istedikleri yerden ekmek alabilecekleri Fazlı Paşa Sarayı’nda vâki‘ iskemle Ma‘rûz, Cennet-mekân firdevs-âşiyân merhûm ve mağfûrun-leh Sultân Ahmed Han -tâbe serâhu- hazretlerinin Enderûn-ı hümâyûn’da binâ buyurdukları kütüphâne-i celîleleri evkāfından olan Fazlı Paşa Sarayı’nda sâkin ashâb-ı arzuhâl basmacı ve boyacı esnâfı arzuhâlde mezkûr Gedik[paşa] fırını ekmekçisi Arnavud Mustafa ve şerîki Mehmed’den bizim kârhânenizde ekl edeceğimiz nân-ı azîzi dilediğimiz fırınlardan iştirâ ve kârhânemize nakle mümâna‘at ve kendileri tabh eyledikleri nâkıs ve nâ-puhte ekmeği bize fürûht için cebr etmeleriyle mezbûrânın hilâf-ı şer‘-i şerîf âhar mahâlle ekmek iştirâmıza müdâhaleleri men‘ olunmak matlûbumuzdur deyü teşekkî eylediklerinde mezbûrân Gedikpaşa ekmekçileri Mustafa ve şerîki Mehmed dahi İstanbul’da vâki‘ fırınların cümlesinin mahâll-i adîdede ekmek satmak için iskemle ta‘bîr olunur mevzi‘leri olmak nizâmımızdan olup ve işbu Fazlı Paşa Sarayı derûnunda ekmek irsâl ve fürûht etmek Gedikpaşa fırınına mahsûsdur deyü iddi‘â ve geçen sene Kadırga limanı fırıncısı es-Seyyid Ebubekir mahâlle-i merkūme ekmek irsâl ve fürûht etmekle nizâm-ı kadîmimize mugāyir olduğundan sâbıkā İstanbul kādısı Yusuf Efendi huzûrunda murâfa‘a ve kethüdâ ve nizâm ustaları haberleriyle mahâll-i mezkûrda bizim fırınımızın iskemlesi olduğu zâhir olmağla merkūm es-Seyyid Ebubekir mahâll-i merkūma ekmek irsâlinden bir kıt‘a i‘lâmıyla memnû‘ olmuşdur deyü takrîr-i meşrûhlarına muvâfık bir kıt‘a i‘lâm ibrâz ve bâlâsına mûcebince amel oluna deyü fermân-ı âlîşân sâdır olmağla zikr olunan iskemleye ta‘arruz olunmayıp lâkin mahâll-i mezkûrda mücerred mezbûrânın iskemlesi olmağla kârhâne-i mezkûreye nakleyledikleri ekmekden iştirâları şer‘an rızâlarına mevkūf ve mezbûrûnun âhar mahâlden ekmek iştirâ eylediklerine mâni‘ olup mücerred iskemlemiz olmağla bizden alın demeleri muvâfık-ı şer‘-i şerîf olmadığı ma‘lûm-ı devletleri buyruldukda emr ü fermân hazret-i men-lehü’l-emrindir. Fî 25 min-Şa‘bân sene 1179