İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 467 Hüküm no: 582 Orijinal metin no: [243-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf’un Şerbetçi Mosi’de olan alacağını tecil ettirip taksitlendirmesi Hukūk Ma‘rûz, Mısır tüccârından arzuhâl eden el-Hâc Yusuf Çarşamba günü huzûr-ı âlîlerinde ma‘kūd meclis-i şer‘-i enverde arzuhâlde mezkûr Şerbetçi Mosi nâm Yahûdîden zimmetinde şeker semeninden bin beş yüz yirmi üç guruş hakkını da‘vâ, ol dahi cevâbında deyn-i merkūm ikrâr lâkin sene-i mâziye Cemâziyelâhiresi gurresinden beher sene yüzellişer guruş vermek üzere deyn-i merkūmu tecîl etmiş idi deyü takrîrine mutâbık bir kıt‘a i‘lâm ibrâz ve mazmûnunu dâyin-i merkūm inkâr etmekle ba‘de’n-nizâ‘ beynlerine Müslimîn tavassutuyla medyûn-ı merkūm Mosi deyn-i merkūmdan peşin iki yüz elli guruş verip ve mâ‘adâ bin iki yüz elli guruşu beher sene ikişer yüz ellişer guruşdan beş sene tamâmına dek müeccelen ve yirmi üç guruşu dahi hâlâ edâ etmek üzere istîcâl eyledikde dâyin-i merkūm dahi râzı olup vech-i meşrûh üzere deyn-i merkūmu tecîl ve kat‘-ı nizâ‘ eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 26 min-Ş sene [11]79.